សម្ដេច ស ខេង ព្រមាននឹងចាត់ការភ្លាមៗ ចំពោះមន្ដ្រីណាធ្វើផ្ដេសផ្ដាសទៅលើប្រជាពលរដ្ឋ
- សេចក្ដីលម្អិត
- ជំពូក៖ ព័ត៌មានជាតិ
ខេត្តបាត់ដំបង ៖ នៅចំពោះមុខមហាជនសម្ដេចក្រឡាហោម ស ខេង នាយករដ្ឋមន្ដ្រីស្ដីទីបានព្រមាននឹងចាត់វិធានការភ្លាមៗចំពោះមន្ដ្រីរូបណាហ៊ានធ្វើផ្ដេសផ្ដាសទៅលើប្រជាពលរដ្ឋ ជាពិសេសប៉ះពាល់សិទ្ធពួកគាត់ ។
ការព្រមានរបស់សម្តេច នាយករដ្ឋមន្ត្រីស្តីទីក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសិក្សា១ខ្នង នៅអនុវិទ្យាល័យខ្នាចរមាស ស្រុកបវេល ខេត្តបាត់ដំបង នាថ្ងៃទី២៣ ខែឧសភានេះ ។
សម្ដេច ស ខេង បានឲ្យដឹងថា៖« មន្ដ្រីក្រោមឱវាទរបស់ក្រសួងមហាផ្ទៃទាំងអស់ តែងតែយកចិត្តទុកដាក់ចំពោះប្រជាពលរដ្ឋគ្រប់រូប មិនបណ្ដែតបណ្ដោយមិនកាន់ជើងអ្នកប្រព្រឹត្តិបទល្មើសដែលធ្វើឱ្យប៉ះពាល់ប្រជាពលរដ្ឋឡើយ» ។
សម្ដេច មានប្រសាសន៍ថា «យើងខ្ញុំ ជាអ្នកទទួលខុសត្រូវកាលណាមានមន្ដ្រីណាធ្វើផ្តេសផ្ដាសទៅលើប្រជាពលរដ្ឋ ប៉ះពាល់សិទ្ធ និងផលប្រយោជន៍ឱ្យតែខ្ញុំបានដឹង រឿងនឹងពិតប្រាកដ ខ្ញុំទទួលខុសត្រូវ ដើម្បីដោះស្រាយ ធ្វើគណនេយ្យភាពរកយុត្តិធម៌ជូនប្រជាពលរដ្ឋពិតប្រាកដ»។
នាឱកាសនោះ សម្ដេច ស ខេង លើកឡើងថា ក្នុងឋានៈជាអ្នកដឹកនាំ ត្រូវបើកបេះដូង ដោយមិនចង្អៀតចង្អល់មិនបែងចែកវណ្ណៈ មិនច្រណែនឈ្នានីស បើឃើញគេរីកចម្រើនត្រូវអបអរសាទរ និងលើកទឹកចិត្តឱ្យគេធ្វើល្អបន្ថែមទៀត ។
សម្ដេចបញ្ជាក់ថា «យើងអត់ចង្អៀតចង្អល់ក្នុងឋានៈជាអ្នកដឹកនាំត្រូវបើកទ្រូងឱ្យចំហរបានសេចក្ដីថា បើកបេះដូងចំហរ ដោយមិនចង្អៀតចង្អល់មិនបែងចែក ហើយមិនច្រណែនឈ្នានីស បើឃើញគេរីកចម្រើនឃើញគេធ្វើល្អត្រូវអបអរសាទរ សប្បាយចិត្ត និងលើកទឹកចិត្ត ឱ្យកាន់តែធ្វើល្អទៅមុខទៀត»។ឆ្លៀតឱកាសនោះ
សម្ដេច ស ខេង នាយករដ្ឋមន្ត្រីស្ដីទី បានលើកឡើងថា នាពេលបច្ចុប្បន្ននេះ ប្រទេសកម្ពុជាបានដើរតួនាទីយ៉ាងសំខាន់ ដើម្បីរួមចំណែកដោះស្រាយនូវវិបត្តិនានាលើសកលលោក ព្រោះថា កម្ពុជាមានបទពិសោធន៍ និងមានឆន្ទៈនយោបាយខ្ពស់ ។
សម្ដេច បញ្ជាក់បន្ថែមថា ៖ «គណបក្សប្រជាជនកម្ពុជាបានដឹកនាំសេដ្ឋកិច្ចទាំងវិស័យអប់រំ កសាងធនធានមនុស្ស ព្រមទាំងដឹកនាំខាងនយោបាយការបរទេស គឺយើងធ្វើ ។
តាំងពីយើងឯការហ៊ុព័ទ្ធខាងនយោបាយ សេដ្ឋកិច្ចមក ឥឡូវនេះកម្ពុជាដើរតួនាទី ដើម្បីរួមចំណែកដោះស្រាយវិបត្តិនានាលើសកលលោក ក៏ដូចក្នុងតំបន់ គឺយើងធ្វើបានដោយសារយើងឆ្លងកាត់បទពិសោធន៍ ហើយការប្ដេជ្ញាចិត្ត និងឆន្ទៈនយោបាយ ដើម្បីជាតិ និងប្រជាពលរដ្ឋ»។
សូមជម្រាបថា ការលើកឡើងរបស់សម្តេចស ខេង ខណៈមានមន្ត្រីមួយចំនួនបានធ្វើសកម្មភាពមិនគប្បីចំពោះប្រជាពលរដ្ឋដោយអាងខ្លួនមានអំណាចផងដែរ ៕
ដកស្រង់ពី៖ កោះសន្តិភាព