រដ្ឋមន្ត្រីកសិកម្មស្នើឱ្យអ៊ីស្រាអែលបង្កើនចំនួននិស្សិតកម្ពុជាទៅសិក្សានៅអ៊ីស្រាអែលបន្ថែមទៀត

សេចក្ដីលម្អិត

ជំពូក៖ ព័ត៌មានជាតិ

លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានស្នើឱ្យក្រុមហ៊ុនAgrostudies Agriculture Capacity Building របស់អ៊ីស្រាអែលបង្កើនចំនួននិស្សិតឱ្យទៅសិក្សានៅប្រទេសអ៊ីស្រាលអែលបន្ថែមទៀតដើម្បីយកចំណេះជំនាញមកអភិវឌ្ឍន៍វិស័យកសិកម្មនៅកម្ពុជាឱ្យកាន់តែរីកចម្រើន។

ការស្នើសុំនេះបានធ្វើឡើងកាលពីរសៀលថ្ងៃទី១៣ ខែមិថុនា នៅក្នុងជំនួបពិភាក្សាការងារជាមួយលោក Yaron Tamir ជានាយកប្រតិបត្តិក្រុមហ៊ុន Agrostudies Agriculture Capacity Building នៅទីស្តីការក្រសួង ។

លោករដ្ឋមន្រ្តី បានថ្លៃងអំណរគុណយ៉ាងជ្រាលជ្រៅជូនចំពោះលោក Yaron Tamir ដែលបានផ្តល់កិច្ចសហប្រតិបត្តិការយ៉ាងល្អប្រសើរជាមួយសាកលវិទ្យាល័យភូមិន្ទកសិកម្ម (RUA) ក្នុងការអភិវឌ្ឍធនធានមនុស្សលើវិស័យកសិកម្មតាមរយ:ការផ្តល់ឱកាសឲ្យនិស្សិតកម្ពុជាឆ្នាំទី៣ បានទៅធ្វើកម្មសិក្សានៅប្រទេសអ៊ីស្រាអែល តាំងពីឆ្នាំ២០០៨ រហូតមកទល់បច្ចុប្បន្នមានរយ:ពេល១៤ឆ្នាំហើយ។

លោករដ្ឋមន្ត្រីបានបញ្ជាក់ថា កម្មសិក្សានេះបានបង្កើនចំណេះដឹងបច្ចេកទេសតាមរយ:ការបណ្តុះបណ្តាលទាំងទ្រឹស្តី និងការអនុវត្តជាក់ស្តែងដល់សិក្ខាកាមវ័យក្មេងដែលមានសក្តានុពលបានយល់ដឹងកាន់តែស៊ីជម្រៅអំពីរបៀបរបបរស់នៅ

និងធ្វើការងារជាក្រុមជាបុគ្គលមានការទទួលខុសត្រូវ មានវិន័យ ជាអ្នកគ្រប់គ្រង ដឹកនាំ សហការល្អ និងខិតខំសិក្សារៀនសូត្រអំពីបច្ចេកវិទ្យាកសិកម្មថ្មីៗ ដើម្បីអភិវឌ្ឍខ្លួនគេ និងប្រទេសកំណើតរបស់ខ្លួន។

ជាក់ស្តែង និស្សិតដែលត្រឡប់មកមាតុភូមិវិញបាននិងកំពុងចូលរួមយ៉ាងសកម្មក្នុងការផ្សព្វផ្សាយបច្ចេកវិទ្យាកសិកម្មទំនើបៗ ដែលខ្លួនបានសិក្សារៀនសូត្រជូនប្រជាកសិករ ខ្លះបម្រើការឲ្យក្រុមហ៊ុន និងខ្លះទៀតធ្វើអាជីវកម្មកសិកម្មដោយខ្លួនគេផ្ទាល់។

លោករដ្ឋមន្ត្រីបានសំណូមពរឲ្យក្រុមហ៊ុនបន្តពង្រឹង និងពង្រីកកិច្ចសហប្រតិបត្តិការនេះឲ្យកាន់តែល្អប្រសើរ និងស្នើសុំបង្កើនចំនួននិស្សិតឆ្លើយតបតាមតម្រូវការធនធានមនុស្សក្នុងវិស័យកសិកម្មដែលមាននិន្នាការកើនឡើងជាលំដាប់

ដើម្បីឈានឆ្ពោះទៅធ្វើការអភិវឌ្ឍវិស័យកសិកម្មកម្ពុជាមានលក្ខណ:ទំនើបកម្មប្រកួតប្រជែង បរិយាប័ន្ន ធន់នឹងការប្រប្រួលអាកាសធាតុ នរវានុវត្តន៍ និងចូលរួមចំណែកទ្រទ្រង់ខឿនសេដ្ឋកិច្ចជាតិ។

លោករដ្ឋមន្ត្រីបានណែនាំដល់សកលវិទ្យាល័យភូមិន្ទកសិកម្មគួររៀបចំចងក្រងបញ្ជីឈ្មោះនិស្សិតកម្មសិក្សាសិក្សាស្រាវជ្រាវឲ្យបានឃើញពីសកម្មភាពការចូលរួមអភិវឌ្ឍវិស័យកសិកម្មបន្ទាប់ពីបានបញ្ចប់កម្មសិក្សារបស់ពួកគេ ទំនាក់ទំនង និងការរីកចម្រើនទាំងចំណេះដឹងវិស័យកសិកម្ម និងសេដ្ឋកិច្ចសង្គម។ល។

ទាក់ទងនឹងសំណើរក្សា ឬបង្កើនចំនួននិស្សិតឲ្យទៅធ្វើកម្មសិក្សានោះលោក Yaron Tamir នាយកក្រុមហ៊ុនបានមានប្រសាសន៍ថានៅចុងខែនេះ ឬដើមខែកក្តដា លោកស្រីឯកអគ្គរដ្ឋទូតអ៊ីស្រាអែល នឹងមកបំពេញទស្សនកិច្ចនៅកម្ពុជាហើយលោកស្រី ក៏មានកម្មវិធីជួបជាមួយលោករដ្ឋមន្រ្តី

នឹងជម្រាបជូនអំពីសំណើនេះដោយផ្ទាល់ផងដែរ។ លោកបានបន្តថា កន្លងមកនិស្សិតកម្ពុជាទទួលបានការកោតសរសើរពីកសិករអីស្រាអែលថា ជានិស្សិតមានការតស៊ូ ឧស្សាហ៍ព្យាយាម ស្មោះត្រង់ និងគោរពវិន័យបានល្អ ហើយនេះគឺជាដើមទុន ឬជាទ្រព្យយ៉ាងល្អសម្រាប់កសាងអនាគតខ្លួនគេ។

ជាមួយគ្នានេះដែរ លោកបានបន្តទៀតថា នាអនាគតដ៏ខ្លីក្រុមហ៊ុនមានបំណងសហការជាមួយក្រសួងបង្កើតមជ្ឈមណ្ឌលបណ្តុះបណ្តាលបច្ចេកទេសកសិកម្មកម្ពុជា ដោយប្រើប្រាស់និស្សិតដែលបានបញ្ចប់កម្មសិក្សាមកធ្វើជាគ្រូបង្គោល

ធ្វើការផ្សព្វផ្សាយបច្ចេកទេសកសិកម្មជូនដល់ប្រជាកសិករ។លោក ង៉ោ ប៉ុនថាន សាកលវិទ្យាធិការបានឲ្យដឹងថា កម្មវិធីហាត់ការនៅប្រទេសអ៊ីស្រាអែល RUA បានធ្វើសហប្រតិបត្តិការជាមួយក្រុមហ៊ុន Agrostudies លើការបណ្តុះបណ្តាលធនធានមនុស្សផ្នែកកសិកម្មតាំងពីឆ្នាំ២០០៨ គិតមកដល់បច្ចុប្បន្នមានអាយុ ១៤ឆ្នាំហើយ មាននិស្សិតសរុបចំនួន ១ ៤៦៩នាក់។

លោកបានបន្តថាសម្រាប់ឆ្នាំ២០២២ មាននិស្សិតដាក់ពាក្យចំនួន ៣១៦នាក់ ក្នុងនោះ សកលវិទ្យាល័យភូមិន្ទកសិកម្ម មាន ២៧៦នាក់វិទ្យាស្ថានជាតិកសិកម្មកំពង់ចាម ១៧នាក់ សាកលវិទ្យាល័យហេង សំរិន ត្បូងឃ្មុំ១៦នាក់ និង សាកលវិទ្យាល័យស្វាយរៀង ០៧នាក់។

សាលាកំពុងធ្វើជ្រើសរើសនិស្សិតដែលមានលក្ខណ: សម្បត្តិគ្រប់គ្រាន់ឆ្លើយតាមតម្រូវការ។

ប៉ុន្តែនៅឆ្នាំនេះ កូតាត្រូវផ្តល់ជូនបានតែ ៥០% នៃចំនួននិស្សិតសរុប ២០០នាក់ កាលពីឆ្នាំ២០២១។

ករណីនេះសាលា បានពិភាក្សាជាមួយក្រុមហ៊ុន និងបានលើកសំណើជូនទៅស្ថានទូតអ៊ីស្រាអែលប្រចាំនៅទីក្រុងបាងកកឲ្យពិនិត្យពិចារណារួចហើយ កំពុងរង់ចាំចម្លើយ៕

 ដកស្រង់ពី៖ កម្ពុជាថ្មី