ក្រុមប្រឹក្សាជាតិប្រឆាំងអំពើពុករលួយអំពាវនាវដល់មន្ត្រី និងប្រជាពលរដ្ឋគ្រប់រូប ចូលរួមប្រយុទ្ធប្រឆាំងអំពើពុករលួយ
- សេចក្ដីលម្អិត
- ជំពូក៖ ព័ត៌មានជាតិ
ភ្នំពេញ៖ ប្រធានក្រុមប្រឹក្សាជាតិប្រឆាំងអំពើពុករលួយបានធ្វើការអំពាវនាវដល់មន្ត្រី និង ប្រជាពលរដ្ឋគ្រប់រូបត្រូវរួមគ្នាប្រយុទ្ធប្រឆាំងនូវរាល់អំពើពុករលួយ ប្រកាន់ខ្ជាប់នូវការគោរពច្បាប់ បទប្បញ្ញត្តិ វិន័យ ក្រមសីល ធម៌វិជ្ជាជីវៈ និងរស់នៅប្រកបដោយភាពស្អាតស្អំ។
ការថ្លែងបញ្ជាក់បែបនេះធ្វើឡើងដោយ លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយក្នុងពិធី អបអរសាទរទិវាជាតិ-អន្តរជាតិប្រយុទ្ធប្រឆាំងអំពើពុករលួយ ០៩ធ្នូ
និងអបអរសាទរកម្ពុជាធ្វើជាម្ចាស់ផ្ទះ និងប្រធានប្តូរវេនស្ថាប័នប្រឆាំងអំពើពុករលួយអាស៊ាន ឆ្នាំ ២០២២
– ២០២៣ អបអរសាទរ ២០ ឆ្នាំនៃការអនុម័តអនុសញ្ញអង្គការសហប្រជាជាតិប្រឆាំងអំពើពុករលួយ ដែលបានរៀបចំឡើងនាថ្ងៃ ទី០៨ ខែធ្នូ ឆ្នាំ២០២២នៅក្នុងសាកលវិទ្យាល័យភូមិន្ទភ្នំពេញ ។
ថ្លែងក្នុងពិធីនេះ ប្រធានក្រុមប្រឹក្សាជាតិប្រឆាំងអំពើពុករលួយបានលើកឡើងដោយអំពាវនាវឱ្យមន្ត្រីរាជការ និងពលរដ្ឋប្រកាន់ខ្ជាប់នូវអភិក្រមទាំង៥ របស់ សម្តេចតេជោហ៊ុនសែន គឺ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» មានអត្ថន័យមហាទូលំទូលាយ ចូលជ្រៅក្នុងដួងចិត្តមន្ត្រីម្នាក់ៗយ៉ាងមាន ប្រសិទ្ធភាព។
លោក មានប្រសាសន៍ថា ទាំងក្រុមប្រឹក្សាជាតិ ទាំងអង្គភាពប្រឆាំងអំពើពុករលួយ បានតំកល់នូវអភិក្រមទាំង ៥ ដ៏ ថ្លៃថ្លានេះនៅក្នុងការងាររបស់ខ្លួនគ្រប់ពេលវេលា។
ក្នុងនាមក្រុមប្រឹក្សាជាតិប្រឆាំងអំពើពុករលួយ លោកបានផ្តល់នូវការគាំទ្រយ៉ាងពេញទំហឹងចំពោះអង្គភាព ដែលប្រកាន់យកវិធានការណ៍អប់រំ
បង្ការទប់ស្កាត់ជា វិធានការណ៍ចម្បង ស្របគ្នានឹងវិធានការណ៍ច្បាប់ប្រកបដោយភាពទន់ភ្លន់ បត់បែង និងម៉ឺងម៉ាត់ ក្នុងការ អនុវត្តយុទ្ធសាស្ត្រប្រយុទ្ធប្រឆាំងអំពើពុករលួយរបស់ខ្លួន”។
លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយបានលើកឡើងដោយបញ្ជាក់បន្ថែមថា៖តាមរយៈការអប់រំបានបង្ហាញដល់មន្ត្រីរាជការ និងប្រជាពលរដ្ឋបានយល់ពីច្បាប់ប្រឆាំងអំពើពុករលួយ បានឃើញពីផលលំបាក នៃអំពើពុករលួយដែល នាំឲ្យមានអយុត្តិធម៌សង្គម ហើយផ្លាស់ប្ដូរផ្នត់គំនិតប្រជាពលរដ្ឋយើងបន្តិចម្ដងៗ ឲ្យមិនចង់ពុករលួយ។
ទន្ទឹមជាមួយគ្នា លោក បានលើកឡើងដោយសង្កត់ធ្ងន់ថា ការសិក្សាវាយតម្លៃហានិភ័យ នៃអំពើពុករលួយតាមវិស័យ នៅក្រសួង-ស្ថាប័ន និងនៅថ្នាក់ក្រោមជាតិ
ដើម្បីដាក់ចេញនូវអនុសាសន៍បង្ការទុកជាមុន ការចូលរួមក្នុងការងារសង្កេតការណ៍ ចំពោះការប្រឡង ការដេញថ្លៃ និងកិច្ចលទ្ធកម្មនានា បានក្លាយជាវិធានការណ៍បង្ការ និងទប់ស្កាត់អំពើពុករលួយយ៉ាងមាន ប្រសិទ្ធភាព និងបានធ្វើឲ្យប្រជាពលរដ្ឋ មិនអាច និងមិនហ៊ានប្រព្រឹត្តអំពើពុករលួយ។
បន្ថែមពីនេះ យន្តការទទួលពាក្យប្តឹង ដ៏សាមញ្ញ ព្រមគ្នានឹងចំណាត់ការលើពាក្យប្ដឹងយ៉ាងរហ័ស បាននាំដល់ការ អនុវត្តច្បាប់របស់អង្គភាពប្រព្រឹត្តិទៅយ៉ាងមានប្រសិទ្ធភាព។
លោក ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានថ្លែងក្នុងពិធីនេះដែរថា៖
កម្ពុជាបានចូលជាសមាជិកនៃអនុសញ្ញាអង្គការសហប្រជាជាតិប្រឆាំងអំពើពុករលួយ ហើយបានរួមកិច្ចសហការជាមួយប្រទេសដទៃទៀតក្នុងការលុបបំបាត់រាល់អំពើពុករលួយនៅក្នុងប្រទេស
របស់ខ្លួន។
តាមរយៈកិច្ចសហការជាមួយបណ្តាប្រទេសដទៃនេះដែរកម្ពុជាក៏បានបង្ហាញពីសកម្មភាពអនុវត្តនូវអនុសញ្ញាបានយ៉ាងខ្ជាប់ខ្ជួន និងបានក្លាយជាប្រទេសមួយទទួលជោគជ័យក្នុងការប្រយុទ្ធប្រឆាំងអំពើពុករលួយផងដែរ៕
ដកស្រង់ពី៖ រស្មីកម្ពុជា