ហ្វីលីពីន ត្រៀមបើកទីផ្សារនាំចូលកសិផលពីកម្ពុជា ដើម្បីឆ្លើយតបនឹងកំណើនពលរដ្ឋ

សេចក្ដីលម្អិត

ជំពូក៖ ព័ត៌មានជាតិ

ភ្នំពេញ៖ ហ្វីលីពីន ត្រៀមបើកទីផ្សារនាំចូលកសិផលពីកម្ពុជា ដែលក្នុងនោះអាចមាន អង្ករ ត្រី សាច់ និងបន្លែជាច្រើន ដើម្បីបង្កើនការធ្វើពាណិជ្ជកម្ម, កិច្ចសហប្រតិបត្តិក្នុងវិស័យកសិកម្ម ជាពិសេស ឆ្លើយតបនឹងកំណើនពលរដ្ឋ។

លោក Francisco P.Tiu Laurel, Jr. រដ្ឋមន្រ្តីក្រសួងកសិកម្មហ្វីលីពីន បានប្រាប់ទៅកាន់ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបពិភាក្សាទ្វេភាគីស្ដី នៅថ្ងៃទី ៩ ខែកញ្ញានេះ។កិច្ចពិភាក្សានេះ បញ្ចប់ដោយលទ្ធផលផ្លែផ្កា ដោយគណៈប្រតិភូទាំងពីរឈរលើគោលជំហរ ពង្រឹងកិច្ចសហប្រតិបត្តិការល្អជាមួយគ្នា ធានានូវសន្តិសុខស្បៀង និងជំរុញកសិ-ពាណិជ្ជកម្មរវាងប្រទេសទាំងពីរ ព្រមទាំងបន្តទៅបំពេញទស្សនកិច្ចទៅកាន់ក្រុមហ៊ុន ខ្មែរហ្វ៊ូតគ្រុប និងកសិដ្ឋានបន្លែនៃសហគមន៍កសិកម្មទំនើបត្រាំកក់ផងដែរ។

ជាមួយគ្នានេះ លោក ឌិត ទីណា មានសុទិដ្ឋនិយមខ្ពស់ក្នុងការជំរុញការងារនាំចេញកសិផលកម្ពុជា និងគូសបញ្ជាក់ទៅកាន់ភាគីហ្វីលីពីនថា កម្ពុជាមានកសិផលដែលមានប្រណិតជាច្រើន ជាពិសេសស្រូវអង្ករក្រអូបដែលមានគុណភាពខ្ពស់ និងរសជាតិឆ្ងាញ់។

យោងតាមរបាយការណ៍របស់អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ ចាប់ពីខែមករា ដល់មិថុនា កម្ពុជាបាននាំចេញកសិផល ៧,៨លានតោន ទៅកាន់ ៧៨ ប្រទេសនៅលើពិភពលោក ក្នុងនោះស្រូវមានជាង ៣,១លានតោន, អង្ករជាង ៣៨ម៉ឺនតោន និង ដំណាំក្រៅពីស្រូវ-អង្ករ មានជាង ៤,២លានតោន។ តួលេខនេះ កើនឡើង ២៧,៦៦ភាគរយ ធៀបនឹងរយៈពេលដូចគ្នាឆ្នាំ២០២៤។ ចំណូលដែលទទួលបានពីការនាំចេញកសិផលទាំងនេះ មានចំនួនជាង ២ ៨៧២លានដុល្លារ ក្នុងនោះស្រូវ បានរួមចំណែក ៦៣៨លានដុល្លារ, អង្ករមានជាង ៣០៧លានដុល្លារ និងដំណាំផ្សេងទៀត មានជាង ១ ៩២៦លានដុល្លារ៕

ដកស្រង់ពី៖ថ្មីៗ