សមាគមអតីតយុទ្ធជនកម្ពុជា ប្រកាសថ្កោលទោស CNRP និងអង្គការសង្គមស៊ីវិល ដែលដើរបញ្ចុះបញ្ចូលអតីតយុទ្ធជន ធ្វើចលនាប្រឆាំងការរំលាយ CNRP

សេចក្ដីលម្អិត

ជំពូក៖ ព័ត៌មានជាតិ

(ភ្នំពេញ)៖ សមាគមអតីតយុទ្ធជនកម្ពុជា បានចេញមកប្រកាសថ្កោលទោសយ៉ាងដាច់អហង្ការ ចំពោះសមាជិកគណបក្សសង្រ្គោះជាតិ (CNRP) និងអង្គការសង្គមស៊ីវិលមួយចំនួន ដែលបានដើរបំផុសអតីតយុទ្ធជន ឲ្យចូលរួមធ្វើចលនាបះបោរប្រឆាំងនឹងការ រំលាយគណបក្សសង្រ្គោះជាតិ ដែលនឹងត្រូវធ្វើឡើងនៅថ្ងៃទី១៦ ខែវិច្ឆិកា ឆ្នាំ២០១៧ខាងមុខដ៏ខ្លីនេះ។

 ក្នុងលិខិតថ្កោលទោសដែល Fresh News ទទួលបាននៅថ្ងៃទី១៤ ខែវិច្ឆិកា ឆ្នាំ២០១៧នេះ នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា បានឲ្យដឹងថា នៅក្នុងរយៈពេលប៉ុន្មានថ្ងៃនេះ មានសមាជិកគណបក្សសង្រ្គោះជាតិ រួមនិងអង្គការសង្គមស៊ីវិលមួយចំនួន បានដើរបំផុសឲ្យអតីតយុទ្ធជន ដែលជាអតីតកងកម្លាំងប្រដាប់អាវុធក្រោកឡើងប៉ះបោរ និងធ្វើសកម្មភាពជាមួយខ្លួនប្រឆាំងការសម្រេចរបស់តុលាការកំពូលក្នុងការរំលាយគណបក្សសង្រ្គោះជាតិនៅថ្ងៃទី១៥-១៦ ខែវិច្ឆិកា ខាងមុខនេះ។

ក្នុងលិខិតថ្កោលទោសនោះ នាយឧត្តមសេនីយ៍ គន់ គីម បានគូសបញ្ជាក់យ៉ាងដូច្នេះ «សមាគមអតីតយុទ្ធជនកម្ពុជាសូមធ្វើការថ្កោលទោសដាច់ខាត ចំពោះសកម្មភាពរបស់ សកម្មជន CNRP មួយចំនួនដែលបានទទួលបញ្ជាពីគណបក្សសង្គ្រោះជាតិ និងអង្គការសង្គមស៊ីវិលមួយចំនួន និងមានពួកបរទេសនៅពីក្រោយ បានដើរឃោសនា បំផុសឲ្យអតីតកងកម្លាំងប្រដាប់អាវុធ ដែលជានិវត្តន៍ជនចូលរួមជាមួយ CNRP នៅថ្ងៃ១៥-១៦ វិច្ឆិកា ខាងមុខនេះ បះបោរប្រឆាំង និងតុលាកាដែលកាត់ក្តីរំលាយគណបក្សសង្គ្រោះជាតិ និងឈានទៅផ្តួលរំលំរាជរដ្ឋាភិបាល»។

នាយឧត្តមសេនីយ៍ គន់ គីម បានគូសបញ្ជាក់ដែរថា ក្នុងមួយជីវិតរបស់អតីតយុទ្ធជន បានធ្វើពលីកម្មគ្រប់បែបយ៉ាងដើម្បីបុព្វហេតុជាតិមាតុភូមិ និងសុខសន្តិភាព របស់ប្រទេសជាតិក្រោយ ពេលចូលនិវត្តន៍ពួកគាត់បានទទូលបានប្រាក់សោធន និងការយកចិត្តទុកដាក់ពីរាជរដ្ឋាភិបាល ហើយតែងតែគាំទ្រការដឹកនាំរបស់រាជរដ្ឋាភិបាល។

តំណាងឲ្យសមាជិក នៃសមាគមអតីតយុទ្ធជនរាប់សិបម៉ឺននាក់ នៅទូទាំងប្រទេសនាយឧត្តមសេនីយ៍ គន់ គីម បានប្រកាសថា អតីតយុទ្ធជនគាំទ្រទាំងស្រុងនូវការរំលាយគណបក្សសង្រ្គោះជាតិ ដែលបានប្រព្រឹត្តទង្វើផ្ទុយនឹងច្បាប់ និងមានចេតនាទុចរិតក្នុងការផ្តួលរំលំរាជរដ្ឋាភិបាលនាំភាពវឹកវរដល់សង្គមជាតិ។

ក្នុងលិខិតបានបញ្ជាក់យ៉ាងដូច្នេះ «យើងខ្ញុំទាំងអស់គ្នាគាំទ្រទាំងស្រុង ចំពោះការរំលាយគណបក្សសង្គ្រោះជាតិ និងការពារដាច់ខាតរាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខ និងសូមធ្វើការប្រឆាំងដាច់ខាត រាល់ការប៉ុន់ប៉ងបះបោររបស់ពួកប្រឆាំង និងសូមឲ្យអាជ្ញាធរមានសមត្ថកិច្ចចាត់វិធានការឲ្យបានហ្មឺងម៉ាត់បំផុតចំពោះពួកល្មើសទាំងនេះ»។

សូមបញ្ជាក់ថា នៅថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ តុលាការកំពូលតាមរយៈបណ្តឹងរបស់ក្រសួងមហាផ្ទៃ នឹងបើកសវនាការជំនុំជម្រះនូវការប្រព្រឹត្តទង្វើផ្ទុយនឹងច្បាប់ស្តីពីគណបក្សនយោបាយរបស់គណបក្សសង្រ្គោះជាតិ។ តាមរយៈបណ្តឹង និងច្បាប់ស្តីពីគណបក្សនយោបាយ គឺគណបក្សសង្រ្គោះជាតិ អាចនឹងត្រូវរំលាយចោល ហើយថ្នាក់ដឹកនាំគណបក្សមួយនេះរហូតដល់ទៅ១១៧រូប ក៏ត្រូវហាមឃាត់ធ្វើនយោបាយរយៈ៥ឆ្នាំផងដែរ៕

ដកស្រង់ពី៖FRESH NEW