ក្រសួងអប់រំ ទុករយៈពេលមួយសប្តាហ៍ ដើម្បីពិនិត្យ​ដោះស្រាយ​ ចំពោះ​ការ​មិន​ពេញ​ចិត្ត​នឹង​លទ្ធផលបាក់ឌុប ឆ្នាំ២០១៨ ក្រោយមានការតវ៉ា

សេចក្ដីលម្អិត

ជំពូក៖ ព័ត៌មានជាតិ

(ភ្នំពេញ)៖ ក្រសួងអប់រំ យុវជន និងកីឡា ទុករយៈពេលមួយសប្តាហ៍ ដើម្បីឱ្យគណៈកម្មការ កោសល្យវិច័យ ធ្វើការពិនិត្យដោះស្រាយ ចំពោះការមិនពេញចិត្ត នឹងលទ្ធផល នៃការប្រឡងសញ្ញាបត្រ មធ្យមសិក្សាទុតិយភូមិ (បាក់ឌុប) សម័យប្រឡង៖ ២០ សីហា ២០១៨ ក្រោយមានការតវ៉ាពីបេក្ខជន។

នេះបើតាមលោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ដែលទើបទទួលបានការតែងតាំងថ្មី បានបញ្ជាក់ប្រាប់ភ្នាក់ព័ត៌មាន Fresh News នៅថ្ងៃទី១៣ ខែកញ្ញានេះ។

ក្រោយមានការតវ៉ាពីសិស្ស មួយចំនួនលើលទ្ធផលបាក់ឌុប ជាពិសេសមុខវិជ្ជាគណិតវិទ្យានោះ លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃទី១២ ខែកញ្ញា ឆ្នាំ២០១៨ម្សិលមិញ បានដឹកនាំកិច្ចប្រជុំគណៈ កម្មការកោសល្យវិច័យ ដើម្បីពិនិត្យដោះស្រាយ ចំពោះបញ្ហានេះ។

Facebook ផ្លូវការរបស់ក្រសួងអប់រំបញ្ជាក់ថា «កិច្ចប្រជុំខាងលើនេះ រៀបចំធ្វើឡើងក្នុងគោលបំណង ដើម្បីពិនិត្យដោះស្រាយ ចំពោះការមិនពេញចិត្ត នឹងលទ្ធផលប្រឡងបាក់ឌុប ឆ្នាំ២០១៨ សម័យប្រឡង៖ ២០ សីហា ២០១៨ ជូនបេក្ខជន មាតាបិតា អាណាព្យាបាល ឬអ្នកពាក់ព័ន្ធ ប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ ដើម្បីធានាបានថា ការប្រឡងដំណើរការ ទៅដោយគោរពតាម គោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន»។

សូមជម្រាបថា ការតវ៉ានេះធ្វើឡើង បន្ទាប់ពីបេក្ខជនមួយចំនួន ពិសេសបេក្ខជនឈ្មោះ ឆាយ លីអាន រៀននៅវិទ្យាល័យហ៊ុនសែនឈូក ដែលធ្លាប់ជាសិស្សពូកែគណិតវិទ្យា ទទួលបានមេដាយ និងពានរង្វាន់គណិតវិទ្យា នៅក្រៅប្រទេសរាប់ភ្លេច តែបែរជាលទ្ធផលប្រឡង មុខវិជ្ជាគណិតវិទ្យា ទៅវិញ៕

ដកស្រង់ពី៖ Fresh News