ឯកឧត្តម ខៀវ កញារីទ្ធ ជំរុញលើកទឹកចិត្តដល់បងប្អូនជាជនពិការទាំងអស់ អោយខិតខំសិក្សារៀនសូត្រ មានសមត្ថភាព និងជំនាញគ្រប់គ្រាន់ ដើម្បីឆ្លើយតបទៅនឹងតម្រូវការរបស់ទីផ្សារការងារ ព្រោះរាជរដ្ឋាភិបាលកម្ពុជា បានផ្តល់រួចហើយនូវតម្លៃ និងអាទិភាពខ្ពស់!

សេចក្ដីលម្អិត

ជំពូក៖ ព័ត៌មានជាតិ

“ក្មួយៗដែល ជាកុមារកំព្រាគថ្លង់ ទោះបីជា ក្មួយៗ ពិការរូបរាង កាយមែនពិត តែដួងចិត្ត ក្មួយៗមិន បានពិការទេ ដូចនេះ ក្មួយៗត្រូវខិតខំ ប្រឹងប្រែងរៀនសូត្រ ក្រេបយក ចំណេះវិជ្ជា ដើម្បីអនាគត របស់ខ្លួន ជាទំពាំងស្នងឬស្សី ជាសសរទ្រូង ប្រទេសជាតិ ព្រោះរាជរដ្ឋាភិបាលកម្ពុជា បានផ្តល់រួចហើយនូវតម្លៃ និងអាទិភាពខ្ពស់ ចំពោះជនពិការទូទាំងប្រទេស”

នេះជាប្រសាសន៍ ដ៍មានអត្ថន័យ របស់ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន ក្នុងឳកាសដែល ឯកឧត្តម និងលោកជំទាវ ទេព ពងរង្សី អញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធខ្លោងទ្វារ វិទ្យាល័យអប់រំពិសេសកំពង់ចាម ពិធីបើកបវេសនកាល ឆ្នាំសិក្សា២០១៨ -២០១៩ និងសំណេះសំណាល ជាមួយកុមារពិការភ្នែក ឬកុមារគថ្លង់កំពង់ចាម នៃអង្គការគ្រួសារថ្មី នៅព្រឹកថ្ងៃទី០១ ខែវិច្ឆិកា ឆ្នាំ២០១៨ ស្ថិតក្នុងក្រុងកំពង់ចាម ខេត្តកំពង់ចាម។

ក្នុងពិធីនោះ ក៍មានវត្តមាន អមដំណើរដោយ ឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ទីប្រឹក្សាអមក្រសួង ប្រធាន អនុប្រធានមន្ទីរព័ត៌មាន មកពីតាមបណ្តាខេត្ត ព្រមទាំងកុមារពិការ ចំនួន ២០០នាក់ កុមារកំព្រាចំនួន ៥៤នាក់ និងលោកគ្រូ អ្នកគ្រូសរុបចំនួន ៤២នាក់ផងដែរ។

ឯកឧត្តមរដ្ឋមន្ត្រី បានមានប្រសាសន៍ ថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលតែងតែ យកចិត្តទុកដាក់ ឧបត្ថម្ភគាំទ្រ ផ្តល់តម្លៃ និងអាទិភាពខ្ពស់ដល់បងប្អូន ជាជនពិការគ្រប់ប្រភេទ នៅទូទាំងប្រទេស ។

ឯកឧត្តម ខៀវ កញ្ញារីទ្ធ បានធ្វើការកោតសរសើរ ចំពោះលោក នាយកគណៈគ្រប់គ្រងសាលា លោកគ្រូ អ្នកគ្រូ និងលោក លោកស្រីបុគ្គលិក ទាំងអស់នៅទីនេះ ដែលជានិច្ចកាល តែងតែយកចិត្ត ទុកដាក់ចំណាយពេលវេលា យកចិត្តមើលថែ បណ្តុះបណ្តាលចំណេះដឹង និងជំនាញដល់ក្មួយៗ ដែលជាជនពិការភ្នែកគ និងថ្លង់ ដើម្បីឲ្យពួកគាត់មានសមត្ថភាព អាចចូលរួមបម្រើការងារ ក្នុងសង្គមដូចគេឯង ។

ឯកឧត្តម ខៀវ កញ្ញារីទ្ធ រដ្ឋមន្ត្រីក្រសួងព័ត៌មាន ក៏បានជំរុញលើកទឹកចិត្ត និងផ្តល់តម្លៃដល់ក្មួយៗ ដែលជាជនពិការ កុំឲ្យអស់សង្ឈឹមក្នុងជីវិត ផ្ទុយទៅវិញត្រូវយកចិត្តទុកដាក់ ខិតខំរៀនសូត្រក្រេប ជញ្ជក់យកចំណេះដឹង និងជំនាញដែលលោកគ្រូ អ្នកគ្រូផ្តល់ឲ្យ ដើម្បីប្រែក្លាយខ្លួន ទៅជាមនុស្សដែល មានសមត្ថភាព និងជំនាញគ្រប់គ្រាន់ ដែលអាចឆ្លើយតប ទៅនឹងតម្រូវការរបស់ ទីផ្សារការងារបានច្រើនប្រភេទ ដែលកំពុងត្រូវការនា ពេលសព្វថ្ងៃ និងទៅកាន់អនាគត ៕