អភិបាលក្រុងប៉ោយប៉ែត និងប្រធានប៉ុស្តិ៍នគរបាលអន្តោប្រវេសន៍ថ្មី ដឹកនាំមន្ត្រីក្រោមឱវាទសម្អាតនៅតាមដងផ្លូវជាតិ រង្វង់មូលច្រកទ្វារព្រំដែន ដើម្បីលើកកម្ពស់សោភ័ណភាពបរិស្ថានក្រុង
- សេចក្ដីលម្អិត
- ជំពូក៖ ព័ត៌មានជាតិ
(បន្ទាយមានជ័យ)៖ លោក សាន ស៊ានហូ អភិបាលក្រុងប៉ោយប៉ែត និងលោក ខឹម ចិត្ត្រា ប្រធានប៉ុស្តិ៍នគរបាលអន្តោប្រវេសន៍ថ្មី នៅថ្ងៃទី២១ ខែមករា ឆ្នាំ២០១៩នេះ បានដឹកនាំមន្ត្រីក្រោមឱវាទ ជាច្រើននាក់ បោសសម្អាត លាងសម្អាត បរិស្ថានតាមដងផ្លូវជាតិ បរិវេណរង្វង់មូល ច្រកទ្វារអន្តរជាតិប៉ោយប៉ែត ដើម្បីប្រែក្លាយច្រកទ្វារអន្តរជាតិប៉ោយប៉ែត ឲ្យស្អាតផូរផង់រួមចំណែកលើកស្ទួយ កិត្យានុភាពជាតិ និងលើកកំពស់សុខមាលភាព។
លោក សាន ស៊ានហូ បានថ្លែងថា ការធ្វើពលកម្មសម្អាតតាមដងផ្លូវជាតិ និងជុំវិញក្រុងប៉ោយប៉ែតនេះ គឺយើងតែធ្វើជាប្រចាំ និងកម្មវិធីផ្សេងៗ ហើយសម្អាតប្រមូលសំរាម តាមដងផ្លូវសាធារណៈនេះ គឺយើងធ្វើឡើងក្នុងគោលបំណងឲ្យប្រជាពលរដ្ឋ អាជីករ កម្លាំងប្រដាប់អាវុធ និងអាជ្ញាធរមូលដ្ឋាន កាន់តែមានភាពជិតស្និតនឹងគ្នារស់នៅក្នុងសហគមន៍មួយរួមគ្នាត្រូវចេះស្រឡាញ់គ្នា ស្រឡាញ់បរិស្ថាន មានអនាម័យល្អ ទើបជិវិតរស់នៅមានសុខភាពល្អទាំងអស់គ្នា។
លោកអភិបាលក្រុង បានបន្តថា ម៉្យាងទៀត ការរួមគ្នាសម្អាតទីក្រុងនេះ គឺធ្វើឱ្យទីក្រុងស្អាត មានសោភ័ណ ភាពល្អ បរិស្ថានល្អ ប្រកបដោយអនាម័យប្រសិទ្ធិភាពខ្ពស់ ច្រកទ្វារអន្តរជាតិប៉ោយប៉ែត ភ្ញៀវជាតិ-អន្តរជាតិចម្រុះជាតិសាសន៍ ដែលបានអញ្ជើញមកទស្សនា ប្រទេសកម្ពុជា និងប្រាសាទអង្គរវត្ត ខេត្តសៀមរាប និងតាមបណ្តាលខេត្តផ្សេងៗរបស់យើង គឺភ្ញៀវទាំងអស់ត្រូវឆ្លងកាត់ច្រក អន្តរជាតិប៉ោយប៉ែត មួយនេះសិនមុននឹងទៅដល់កន្លែងផ្សេងៗ។
ក្នុងនោះដែរ អាជ្ញាធរក្រុងប៉ោយប៉ែត ក៏បានអំពាវនាវដល់បងប្អូនប្រជាពលរដ្ឋ ជាពិសេសអាជីវករលក់ដូរ តាមដងផ្លូវត្រូវរៀបចំសំរាមដាក់ក្នុង ស្បោងប្លាស្ទីក ហើយយកទៅដាក់ក្នុងធុងសំរាម ឱ្យបានត្រឹមត្រូវកុំចោលពាលវាលដែលជាហេតុធ្វើឱ្យបរិស្ថានយើងមិនល្អ។
ដូច្នេះយើងទាំង អស់គ្នា ត្រូវតែរួមគ្នា ការពារបរិស្ថានក្នុងប្រទេសយើង។ ជាមួយគ្នានេះដែរលោក ខឹម ចិត្ត្រា ជំរុញឱ្យមន្ត្រីថ្នាក់គ្រប់ជាន់ថ្នាក់ ព្រមទាំងអាជីវករ ប្រជាពលរដ្ឋ ឱ្យចូលរួមចំណែកទាំងស្មារតី សម្ភារ និងកម្លាំងចិត្ត កម្លាំងកាយក្នុងទិសដៅ លុបបំបាត់ភាពកង្វក់ មានអនាម័យ គ្មានសំរាម គ្មានថង់ផ្លាស្ទិច គ្មានការក៏ស្ទះលូ ដើម្បីប្រែក្លាយច្រកទ្វារអន្តរជាតិប៉ោយប៉ែត ឱ្យស្អាតផូផង់រួមចំណែក លើកស្ទួយកិត្យានុភាពជាតិ និងលើកកំពស់សុខមាលភាព ប្រជាជនឱ្យកាន់តែល្អប្រសើរ៕
ដកស្រង់ពី៖ Fresh News