សម្ដេចតេជោ ហ៊ុន សែន ប្រកាស​ថា សម្ដេចគ្មានសញ្ជាតិបរទេស និងផ្ទះនៅបរទេសទេ ជម្រើស​សម្ដេចតែមួយគត់ គឺនៅជាមួយ​ពលរដ្ឋកម្ពុជា

សេចក្ដីលម្អិត

ជំពូក៖ ព័ត៌មានជាតិ

(កណ្ដាល)៖ សម្ដេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា នៅព្រឹកថ្ងៃទី២០ ខែកុម្ភៈ ឆ្នាំ២០១៩នេះ បានប្រកាសឲ្យប្រជាពលរដ្ឋកត់ចំណាំថា សម្ដេចគ្មានផ្ទះនៅបរទេស ហើយក៏គ្មានសញ្ជាតិបរទេសដែរ ដូច្នេះហើយទោះមានរឿងអ្វីក៏ដោយ ជម្រើសរបស់សម្ដេច គឺនៅរួមរស់ជាមួយប្រជាពលរដ្ឋកម្ពុជា គ្រប់កាលៈទេសៈ។

ពីលើវេទិកា ក្នុងឱកាសបន្តជួបសំណេះសំណាលជាមួយកម្មករ កម្មការិនី សរុបប្រមាណ១១,២២៧នាក់ មកពីរោងចក្រ សហគ្រាសចំនួន៣៤ នៅក្នុងខេត្ដកណ្ដាល សម្ដេចតេជោ ហ៊ុន សែន ក្រៅពីប្រកាសមិនរត់ចោល ប្រជាជាតិកម្ពុជាហើយនោះ សម្ដេចក៏បានអះអាងថា សម្ដេចសុខចិត្តនៅខាំស្មៅ រួមរស់ជាមួយប្រជាពលរដ្ឋ។

ក្នុងពិធីនៅព្រឹកមិញនេះ សម្ដេចតេជោនាយករដ្ឋមន្ដ្រី បានមានប្រសាសន៍យ៉ាងដូច្នេះថា «ខ្ញុំអត់មានសញ្ជាតិបរទេស អត់មានផ្ទះនៅបរទេសទេ ជម្រើសរបស់ខ្ញុំតែមួយគត់ គឺជម្រើសខាំស្មៅនៅ ជាមួយប្រជាពលរដ្ឋកម្ពុជា ដូច្នេះគ្រប់យ៉ាងដោះស្រាយដើម្បីរីកលូតលាស់នៃប្រទេស និងប្រជាជនកម្ពុជាតែប៉ុណ្ណោះ»។

នាយករដ្ឋមន្ដ្រីដែលហ៊ានយក ជីវិតធ្វើដើមទុនរំដោះប្រទេស ចេញពីភ្លើងសង្គ្រាម រហូតមានសន្ដិភាព និងការអភិវឌ្ឍដូចពេលបច្ចុប្បន្ននេះ ក៏បានគូសរំលេចថា គណបក្សប្រជាជនកម្ពុជា មានការចូលរួមយ៉ាងកុះកររបស់ប្រជាជន ការគាំទ្ររបស់ប្រជាជន ហើយជាគណបក្សរបស់ ប្រជាជនបម្រើប្រជាជន នៅរួមរស់រួមសុខរួមទុក្ខ ជាមួយនឹងប្រជាជនមិនដែលរត់ចោលប្រជាជនម្ដងណាឡើយ។

សម្ដេចប្រមុខរដ្ឋាភិបាល បានផ្ដាំផ្ញើដល់កម្មករ កម្មការិនីនិយាយដោយឡែក និងនិយាយជារួម ប្រជាពលរដ្ឋខ្មែរទាំងអស់ ត្រូវចាំឲ្យច្បាស់ និងស្គាល់ឲ្យច្បាស់ មុខរបស់សម្ដេច និងថ្នាក់ដឹកនាំគណបក្សប្រជាជនកម្ពុជា ព្រោះថាទាំងសម្ដេច និងថ្នាក់ដឹកនាំផ្សេងទៀត មិនទៅណាចោលប្រជាជន កម្ពុជាមួយជំហ៊ាននោះទេ។ 

ជាមួយគ្នានេះ សម្ដេចតេជោ ហ៊ុន សែន ក៏បានរំលឹកផងដែរថា ពិតណាស់សម្តេចធ្លាប់បានរត់ចោល ស្រុកកាលពីឆ្នាំ១៩៧៧តែការរត់ពេលនោះ គឺដើម្បីកសាងកម្លាំង រំដោះប្រទេសជាតិ មិនមែនរត់ទៅសម្ងំសុខម្នាក់ឯងនោះឡើយ៕

ដកស្រង់ពី៖ Fresh News