បើរំលឹកថយក្រោយបន្តិច យើងនៅចាំបាន ពាក់ព័ន្ធនឹងរបាយការណ៍មួយពី CIRP ដែលមានពាក្យពេញ Consumer Intelligence Research Partners បានចុះផ្សាយឲ្យដឹងថា iPhone XR ក្នុងពេលចេញលក់ សម្រាប់មួយខែដំបូង គឺលក់បានដល់ទៅ 32% ខណៈពេល iPhone XS និង XS Max លក់បានលើសតែ 3% ប៉ុណ្ណោះ។ នេះអាចបង្ហាញឲ្យដឹងថា XR លក់ដាច់រាប់សិបលានគ្រឿងឯណោះ សម្រាប់តែមួយខែដំបូង ពេលវាមានវត្តមានចូលទៅដល់ក្នុងទីផ្សារជាតិ និងអន្តរជាតិ។

ដោយឡែក សម្រាប់ក្នុងពេលថ្មីៗនេះ ស្របពេលដែល iPhone ជំនាន់ទី 11 មិនទាន់ដល់ថ្ងៃប្រកាសចេញ ជាផ្លូវការនោះ ខាង CIRP ដដែល បានធ្វើការចេញផ្សាយបន្តទៀត ទាក់ទងនឹងចំនួនលក់របស់ iPhone XR។ ជាការពិតណាស់ តាមរបាយការណ៍ បានបញ្ជាក់ថា គិតមកត្រឹមដើមត្រីមាសទី 3 នេះ iPhone XR បានកើនប្រជាប្រិយភាព លើចំនួនលក់ដាច់ខ្លាំងមែនទែន គឺសឹងតែជិតពាក់កណ្តាលទៅហើយ នៃចំនួនលក់សរុបលើ iPhone ទាំងអស់ (គិតចាប់ពី iPhone 6s – iPhone XS Max) សម្រាប់នៅក្នុងទីផ្សារសហរដ្ឋអាមេរិច។ តាមទិន្នន័យបានបង្ហាញថា iPhone XR កើនចំនួនលក់ដាច់សរុប ស្មើរនឹង 48% ដែលក្បែរ 50% ទៅហើយ ក្នុងម៉ូឌែលតែមួយនេះ។ 

 យ៉ាងណា បើនិយាយជារួមទៅ ចំនួនលក់បានច្រើនបែបនេះ គឺអាចដោយសារតែ iPhone XR មានចំនុចពិសេសៗច្រើន ទោះបីជាកម្រិតអេក្រង់ទាប ជាងបងធំ 2 ទៀត ប៉ុន្តែវាស្ថិតនៅទំហំកណ្តាល មានពណ៌ចម្រុះច្រើនជាង ដើរលឿនដូចគ្នា និងមានកាមេរ៉ាខាងក្រោយ មួយគ្រាប់ ដែលខ្លឹម តែម្តង។ អញ្ចឹងហើយ អ្នកប្រើប្រាស់ ឬក៏ដូចជាយុវវ័យ ប្រាកដជាពេញចិត្តលើ iPhone XR មិនចាញ់ XS & XS Max ប៉ុន្មានដែរ ខណៈពេលដែលតម្លៃរបស់វា ក៏ខុសគ្នាច្រើនគួសសមដែរ។

ដកស្រង់ចេញពីCamborReport