អេក្រង់ OLED ចិន ឆ្លងមិនផុតការធ្វើតេស្តគុណភាពពី Samsung

សេចក្ដីលម្អិត

ជំពូក៖ ព័ត៌មានផ្សេងៗ

កាលពីជាងមួយខែមុនមានការរាយការណ៍ដែលអះអាងថា Samsung បានជួបនិយាយជាមួយក្រុមហ៊ុនផលិតអេក្រង់ OLED ចិនឈ្មោះ BOE អំពីការផ្គត់ផ្គង់អេក្រង់ OLED សម្រាប់ស្មាតហ្វូន Samsung មួយចំនួន រួមមាន Galaxy S ជំនាន់ថ្មីផងដែរ។

យ៉ាងណាក្ដីបើតាមដំណឹងថ្មីចុងក្រោយចេញផ្សាយដោយសារព័ត៌មានកូរ៉េខាងត្បូង DDaily បានឲ្យដឹងថាអេក្រង់ OLED របស់ BOE គឺមិនអាចឆ្លងផុតការធ្វើតេស្តគុណភាពរបស់ Samsung បាននោះទេ។ ប៉ុន្តែ DDaily បានសន្និដ្ឋានថា BOE នៅមានពេលវេលាបន្ថែមដើម្បីអាចឆ្លងផុតការធ្វើតេស្តលើគុណភាពនេះ។

Samsung Display ត្រូវបានគេចាត់ទុកថាជាក្រុមហ៊ុនផលិតអេក្រង់ OLED ល្អជាងគេនាពេលបច្ចុប្បន្ននេះ ដោយមានក្រុមហ៊ុនស្មាតហ្វូនធំៗជាច្រើនជាអតិថិជន រួមមាន Apple, OnePlus រួមទាំង Samsung ខ្លួនឯងផងដែរ។

ចំណែកក្រុមហ៊ុន BOE វិញទោះបីជាអេក្រង់ OLED ដែលក្រុមហ៊ុនផ្ដល់ មានតម្លៃធូរជាង Samsung Display មែន ប៉ុន្តែភាពខុសគ្នាលើគុណភាពគឺនៅមានគម្លាតឆ្ងាយ បើផ្អែកតាមលទ្ធផលធ្វើតេស្តរបស់ Samsung៕

ដកស្រង់ពី៖sabay