ចិត្តមិនចាញ់ឧកញ៉ាមានលុយវាល់លាន ខាត់ សុឃីម បន្តជួលបន្ទប់ឲ្យកម្មករក្នុងតម្លៃថោកបំផុត
- សេចក្ដីលម្អិត
- ជំពូក៖ ព័ត៌មានផ្សេងៗ
សិល្បការិនីមានពហុជំនាញ ប្រកបដោយវោហារសព្ទ គឺអ្នកនាង ខាត់ សុឃីម ប្រកាសបន្តជួលបន្ទប់ស្នាក់នៅថោកបំផុតក្នុងរាជធានីភ្នំពេញដល់អ្នកស្នាក់នៅ រហូតដល់ស្ថានភាពជំងឺកូវីដ-១៩ បានល្អប្រសើរទាំងស្រុង។
ការប្រកាសនេះធ្វើឡើងក្រោយពីមានសំណួរជាច្រើន សួថាតើអ្នកនាងនឹងរម្លើងថ្លៃបន្ទប់ជួលទេ? ក្នុងគ្រាហ៍ដែលនាងត្រូវការលុយដើម្បីដោះស្រាយការចំណាយផ្សេងៗ ក្រោយពីនាងបាត់ចំណូលស្ទើរទាំងស្រុងពីវិស័យសិល្បៈ។ អ្នកនាង ខាត់ សុឃីម និយាយថា អ្នកនាងយល់ច្បាស់ពីការលំបាករបស់បងប្អូន ជាពិសេសកម្មករ-កម្មការិនីក្នុងគ្រាហ៍នេះ ទើបអ្នកនាងសម្រេចចិត្តច្បាស់ហើយថា នឹងបន្តអនុវត្តតម្លៃជួលបន្ទប់នេះរហូតដល់ជំងឺកូវីដ-១៩ ផុតរលត់ពីកម្ពុជាទាំងស្រុង។
ទោះបីជាអ្នកនាងត្រូវការលុយច្រើន ហើយពេលខ្លះមានការខ្វះខាតទៀតផងនៅក្នុងអំឡុងពេលវិបត្ដិជំងឺកូវីដ-១៩ នេះ ក៏អ្នកនាងមិនផ្លាស់ប្ដូរចិត្ត ឬសើរើរឿងថ្លៃបន្ទប់បងប្អូនដែលកំពុងស្នាក់នៅដែរ។ អ្នកនាង ខាត់ សុឃីម មានបន្ទប់ជួលចំនួន៣៦បន្ទប់ ស្ថិតនៅម្ដុំលូប្រាំ ក្រោយធនាគារវឌ្ឍនៈ ក្នុងខណ្ឌមានជ័យ រាជធានីភ្នំពេញដែលទើបសង់រួចនៅឆ្នាំ២០១៩។
តម្លៃបន្ទប់មានចាប់ពីចន្លោះពី៣០ ទៅ៣៥ដុល្លារក្នុង១ខែ ប៉ុន្ដែអ្នកនាងបានបញ្ចុះតម្លៃមកនៅត្រឹម១៥ដុល្លារក្នុង១ខែ ចាប់តាំងពីថ្ងៃទី២៦ ខែមីនា ឆ្នាំ២០២០ មកម្ល៉េះ៕
ដកស្រង់ពី៖ Sabay