អ្នកល្អពេកហើយ! Angelina Jolie មកលេងខ្មែរលើកនេះ ក្រោយលះបង់ធ្វើរឿងដ៏ធំមួយឱ្យកូនប្រុសជនជាតិខ្មែររបស់នាង

សេចក្ដីលម្អិត

ជំពូក៖ ព័ត៌មានផ្សេងៗ

វត្តមានរបស់តារាហូលីវូតដ៏ល្បីល្បាញលំដាប់ពិភពលោក Angelina Jolie នៅលើទឹកដីអង្គរ ខេត្តសៀមរាប បានបង្កការភ្ញាក់ផ្អើលជាខ្លាំងដល់អ្នកគាំទ្រ និងប្រជាជនកម្ពុជាស្ទើរទូទាំងប្រទេស។ ជារឿយៗតារាស្រីសញ្ជាតិអាមេរិករូបនេះ តែងបង្ហាញខ្លួននៅលើទឹកដីប្រទេសកម្ពុជា ដើម្បីបំពេញបេសកកម្មសប្បុរសធម៌ និងការថតភាពយន្តជាដើម ព្រោះតែក្ដីស្រលាញ់ដែលនាងមានចំពោះប្រទេសកម្ពុជា និងប្រជាជនខ្មែរ។

បើតាមប្រភពព័ត៌មានពីអ្នកខេត្តសៀមរាប ក៏ដូចជាភ្ញៀវទេសចរ ដែលបានប្រទះឃើញវត្តមាន Angelina Jolie ឱ្យដឹងថា តារាស្រីដ៏ឆ្នើមរូបនេះ បានមកប្រទេសកម្ពុជា កាលពីថ្ងៃទី ២១ ខែកុម្ភៈ ឆ្នាំ ២០២២នេះ ប៉ុន្តែមិនដឹងថាការអញ្ជើញមកលើកនេះក្នុងគោលដៅទេសចរណ៍ ឬបំពេញបេសកកម្មណាមួយនោះទេ ។

យ៉ាងណាមិញមានការលើកឡើងថា អ្នកស្រី Angelina Jolie បានអញ្ជើញចូលរួមពិធីមង្គលការមួយនៅឯខេត្តសៀមរាបទៀតផង។ អ្វីដែលគួរឱ្យកត់សម្គាល់មុនអញ្ជើញមកលេងប្រទេសកម្ពុជាលើកនេះ អ្នកនាង Angelina Jolie ទើបតែប្រកាសផ្ទេរមរតកទាំងអស់តម្លៃ ១២០លានដុល្លារ ទៅឱ្យកូនប្រុសចិញ្ចឹមជាជនជាតិខ្មែរឈ្មោះ Maddox Jolie-Pitt ។

កូនប្រុសចិញ្ចឹមជនជាតិខ្មែរវ័យ ២១ឆ្នាំរូបនេះ គឺជាមនុស្សតែម្នាក់គត់ក្នុងចំណោមបងប្អូន ៦នាក់ ដែលបានស្នងទ្រព្យសម្បត្តិដ៏ច្រើនលើសលប់នេះ។ គួរឱ្យដឹងថា Maddox ដែលមានឈ្មោះដើមថា រ័ត្ន វិបុល កើតឆ្នាំ ២០០០ ជាកុមារកំព្រាត្រូវបានគេយកទៅចិញ្ចឹមក្នុងមណ្ឌលកុមារកំព្រាមួយកន្លែង ជាភ័ព្វសំណាង ក្នុងការធ្វើដំណើរទស្សនកិច្ចរបស់អ្នកស្រី Angelina Jolie ជាមួយអង្គការសហប្រជាជាតិក្នុងឆ្នាំ ២០០២ អ្នកស្រីបានជួបនឹងទារករូបនេះហើយក៏មានចិត្តអាណិតស្រលាញ់ និងសុំយកទៅធ្វើជាកូនចិញ្ចឹម ។

ព្រោះស្នាមញញឹមរបស់ក្មេងប្រុសរូបនេះ បានធ្វើឱ្យអ្នកស្រី កើតមាននិស្ស័យស្រលាញ់ រហូតយក Maddox ចុះក្នុងបញ្ជីគ្រួសាររបស់អ្នកស្រី ។ បច្ចុប្បន្ននេះ Maddox បានកែប្រែជីវិតពីកុមារនៅក្នុងមណ្ឌលក្លាយជាកូនប្រុសកំពូលតារាស្រីជាមួយនឹងការស្នងមរតកជាងរយលានដុល្លារ៕

ដកស្រង់ពី៖Sabay