ស្ងាត់ៗ តារាសម្ដែង សឿន វីតា ងាកមកចាប់ដៃគូជាមួយមិត្តម្នាក់ បើកហាងលក់ទូរស័ព្ទធ្វើព្រងើយ!
- សេចក្ដីលម្អិត
- ជំពូក៖ ព័ត៌មានផ្សេងៗ
តារាសម្ដែងលោក សឿន វីតា ដែលបានឃ្លាតឆ្ងាយពីសិល្បៈមួយរយៈដោយសារកូវីដ១៩នោះ ពេលនេះបានងាកចាប់ដៃគូសហការជាមូយមិត្តភ័ក្កម្នាក់បើកហាងលក់ទូរសព្ទដៃ ដែលមានយីហោថា "ស្នាដៃកូនខ្មែរ" ស្ថិតនៅខាងលិចវិឡាល័យសន្ធរម៉ុក តាមផ្លូវកម្ពុជាក្រោម។
ក្នុងគ្រាជួបជាមួយអ្នកសារព័ត៌មានដោយចៃដន្យ លោក សឿន វីតា បានបង្ហាញពីភាពរីករាយ និងបានបង្ហើបថា អាជីវកម្មមួយនេះ លោកទើបនឹងចាប់ដៃគូជាមួយមិត្តភ័ក្កទេបង្កើតឡើង ប៉ុន្មានខែនេះទេ ក្រោយការបើកផ្លូវរបស់មិត្តភ័ក្តិឲ្យលោកចូលមករួមចំណែក។ លោក ថ្លែងថា៖”គាត់ឃើញយើងហត់ពេកទៅលើការងាររបរអនឡាញ ដូចដែលបងដឹងស្រាប់ អីចឹងហើយបានគាត់ហៅមកដើម្បីក្លាយជាដៃគូសហការ ដោយចែកភាគលាភទៅតាមហ្នឹងនៅពេលបានផលចំណេញ”។
ត្បិតថា ខ្លួនមិនមានពិសោធន៍ច្រើនលើមុខរបរពេញនិយមនេះ ប៉ុន្តែតារាសម្ដែងមាឌឌាំង អះអាងថា តាមរយៈ មានក្ដីសង្ឃឹមច្រើន ដោយសារតែមិត្តភ័ក្តិរបស់លោក គេមានជំនាញខាងរបរទូរសព្ទនេះស្រាប់ ផ្សំនឹងឃើញឱកាសថា មុខរបរនេះមានទីផ្សារល្អ។ ដូច្នេះហើយ ប្រសិនបើហ្វេនៗ ទស្សនិកជន ឬមិត្តសិល្បៈណាមានតម្រូវការលើទូរស័ព្ទដៃអាចមករកលោកបាន។
តាមការបញ្ជាក់របស់ វីតា អាជីវកម្មរបស់លោក និងមិត្តភ័ក្តិនេះ មិនត្រឹមតែលក់ទេ តែក៏មានសេវាជួសជុល រួមទាំងសេវាដូរទូរស័ព្ទចាស់យកថ្មី ព្រមទាំងសេវាបង់រំលស់ថែមទៀត ដែលមធ្យោបាយពេញនិយមមួយនាពេលបច្ចុប្បន្ន។ ដោយសារតែបែបនេះហើយ លោកថា គិតតែត្រឹមពេលនេះ អាជីវកម្មរបស់លោក និងមិត្តភ័ក្តិបាន និងកំពុងដំណើរល្អ មានអតិថិជនចេញចូលឥតដាច់ហើយ។
តារាសម្ដែងសម្បុរស្រអែម បានដាក់ក្ដីរំពឹងខ្ពស់ថា អាជីវកម្មថ្មីនេះ ទំនងអាចនឹងជួយលោកបង្កើតជាប្រភពចំណូលរឹងមាំមួយផ្នែកទៀត ក្រៅពីសិល្បៈ និងមុខជំនួញលើអនឡានរបស់លោក។ លោក សឿន វីតា ជាតារាសម្ដែងគួរចាប់អារម្មណ៍ម្នាក់ ក្នុងនោះក៏ព្រោះលោកមានរូបរាងខ្ពស់សង្ហា សាច់ដុំធំៗ ពិសេស គឺលោកចូលចិត្តសម្ដែងជាតួអង្គកម្សត់ ក្រីក្រលំបាកជាដើម។ ក្រៅតែពីអាជីពជាតារាសម្ដែង លោកក៏ជាអ្នករកស៊ីអនឡាញលេចធ្លោម្នាក់ផង មុនមកចាប់ដៃគូជាមួយមិត្តភ័ក្តិ លើអាជីវកម្មថ្មីផ្នែកលក់ទរូរស័ព្ទថែមទៀតនាពេលថ្មីៗនេះ៕
ដកស្រង់ពី៖ Sabay