គ្រោះរញ្ជួយដីកម្រិតធ្ងន់ វាយប្រហារលើភាគអាគ្នេយ៍កោះតៃវ៉ាន់

សេចក្ដីលម្អិត

ជំពូក៖ ព័ត៌មានផ្សេងៗ

គ្រោះរញ្ជួយដីកម្រិត ៦.៨រ៉ិចទ័រ បានវាយប្រហារលើតំបន់ដាច់ស្រយាលមួយ ស្ថិតនៅភាគអាគ្នេយ៍ នៃកោះតៃវ៉ាន់ កាលពីថ្ងៃអាទិត្យ ដោយបង្កឱ្យមានរថភ្លើងធ្លាក់ផ្លូវ ហាងទំនិញដួលរលំ និងជាប់មនុស្សនៅលើភ្នំ។

ការិយាល័យឧតុនិយមតៃវ៉ាន់ បានឱ្យដឹងថា គ្រោះរញ្ជួយដីខាងលើ មានចំណុចកណ្ដាលនៅក្នុងតំបន់តៃទុង (Taitung) ហើយវាបានកើតឡើងតែប៉ុន្មានម៉ោងប៉ុណ្ណោះ បន្ទាប់ពីគ្រោះរញ្ជួយដីកម្រិត ៦.៤រ៉ិចទ័រ វាយប្រហារលើតំបន់ដូចគ្នាដដែល កាលពីល្ងាចថ្ងៃសៅរ៍ចុងសប្ដាហ៍នេះ។

ដោយឡែកបើតាមទីភ្នាក់ងារភូមិវិទ្យា អាមេរិក USGS គ្រោះរញ្ជួយដីនេះ មានកម្រិតរញ្ជួយដល់ទៅ ៧.២រ៉ិចទ័រឯណោះ និងមានជម្រៅរញ្ជួយទៅក្នុងដី១០គីឡូម៉ែត្រ ព្រមទាំងបង្កឱ្យមានការខូចខាតមួយចំនួនផងដែរ តែមិនទាន់មានសេចក្តីរាយការណ៍ពីជនរងគ្រោះណាម្នាក់នៅឡើយទេ។

សូមរំលឹកថា មនុស្សជាង ១០០នាក់ បានស្លាប់នៅក្នុងគ្រោះរញ្ជួយដីមួយ ដែលបានវាយប្រហារលើតំបន់ភាគអាគ្នេយ៍កោះតៃវ៉ាន់ កាលពីឆ្នាំ២០១៦ ខណៈគ្រោះរញ្ជួយដីកម្រិត ៧.៣រ៉ិចទ័រ បានផ្ដាច់ជីវិតមនុស្សជាង ២.០០០នាក់ កាលពីឆ្នាំ១៩៩៩ នេះបើតាមការផ្សាយរបស់ Reuters កាលពីថ្ងៃអាទិត្យ។