គុណសម្បត្តិរបស់ S23 ជួយឱ្យ Samsung ដណ្តើម Top1 ពី Apple វិញ

សេចក្ដីលម្អិត

ជំពូក៖ ព័ត៌មានផ្សេងៗ

កាលពីត្រីមាសទី៤ នៃឆ្នាំ២០២២ ក្រុមហ៊ុន Samsung បានបាត់បង់តំណែងលេខ១ នៃការលក់ស្មាតហ្វូនទូទាំងពិភពលោក ដោយធ្លាក់ចូលក្រោមដៃរបស់ Apple។ ប៉ុន្តែក្រោយការចេញស៊េរី S23 មក បានជំរុញសន្ទុះលក់របស់ Samsung ហើយឡើងមកឈរលើគេវិញ នៅត្រីមាសទី១ នៃឆ្នាំ២០២៣នេះ។

ក្រុមហ៊ុន Samsung បានលក់ស្មាតហ្វូនប្រមាណ ២២% នៃចំនួនស្មាតហ្វូនទាំងអស់ក្នុងទីផ្សារសាកល ក្នុងត្រីមាសទី១ឆ្នាំនេះ ពោលគឺជាចំនួនច្រើនជាងគេបង្អស់ស្ថិតក្នុងលំដាប់ទី១ ខណៈ Apple ធ្លាក់មកលេខ២វិញ ដោយមានចំណែកទីផ្សារស្មាតហ្វូន ២១%។ ក្នុងចំណោមការលក់ស្មាតហ្វូន Samsung គឺបានការចូលរួមចំណែកយ៉ាងធំពីស៊េរី S23 ពោលគឺលក់បានខ្ពស់ជាង ៧០% នៃ ស៊េរី S22 ក្នុងទីផ្សារមួយចំនួន។

ក្រៅពីនេះ ចំណាត់ថ្នាក់ទី៣ បានទៅលើ Xiaomi មានចំណែកទីផ្សារ ១១% និង OPPO លេខ៤ ជាមួយនឹងចំណែក ១០% ផងដែរ។ ដោយឡែក vivo ស្ថិតនៅលេខរៀងទី៥។ បើតាមការវិភាគរបស់ក្រុមហ៊ុនស្រាវជ្រាវទីផ្សារ Canalys បង្ហាញថា ទីផ្សារស្មាតហ្វូន នឹងកាន់តែមានស្ថិរភាពនៅចុងត្រីមាសទី២ នៃឆ្នាំ២០២៣នេះ។ អ្នកជំនាញជាច្រើនក៏បានជឿជាក់ថា ទីផ្សារស្មាតហ្វូន នឹងវិលទៅរកភាពប្រក្រតីវិញ នៅចុងឆ្នាំនេះផងដែរ៕

ដកស្រង់ពី៖Sabay