ធ្លាប់ឆ្ងល់ទេថា តើគួរបញ្ឆេះរថយន្តចោលប៉ុន្មាននាទី ទើបអាចដាក់លេខបើកចេញដំណើរទៅបាន?
- សេចក្ដីលម្អិត
- ជំពូក៖ ព័ត៌មានផ្សេងៗ
មកទល់ពេលនេះ នៅតែមានការជជែកវែកញែកគ្នាច្រើនអំពីថាតើ គួរបញ្ឆេះរថយន្តចោលប៉ុន្មាននាទីសិន ទើបអាចដាក់លេខបើកធ្វើដំណើរចេញទៅបាន។
អ្នកបើកបរភាគច្រើន ជឿជាក់ថា បន្ទាប់ពីដេរបញ្ឆេះហើយ ទុកឱ្យវាក្តៅម៉ាស៊ីនបន្តិចសិន ទើបដាក់លេខចេញដំណើរ ដើម្បីឱ្យម៉ាស៊ីនមានអាយុកាលប្រើប្រាស់បានយូរ ព្រោះពួកគេយល់ថា ពេលបញ្ឆេះភ្លាម ប្រេងម៉ាស៊ីន មិនទាន់ហូរចូលជ្រាបគ្រឿងបង្គុំផ្សេងៗភ្លាមនោះទេ ហើយបើបង្ខំបើកចេញភ្លាមៗនោះ នឹងធ្វើឱ្យឆាប់រិចរឹលម៉ាស៊ីន។
ការពិតទៅ ប្រសិនបើអ្នកប្រើប្រាស់រថយន្តចាប់ពីស៊េរីឆ្នាំ២០០០មក គឺមិនចាំបាច់ត្រូវបញ្ឆេះម៉ាស៊ីនចោលយូរទេ ដែលនាំឱ្យខ្ជះខ្ជាយពេលវេលា សាំង និងបំពុលបរិស្ថាន ព្រោះថា រថយន្តទាំងអស់នោះ គឺសុទ្ធតែបំពាក់មកជាមួយប្រព័ន្ធប៊ិចសាំង។ ប្រព័ន្ធនេះ គឺវាបាញ់សាំងយ៉ាងលឿនដុតបញ្ឆេះជាមួយខ្យល់ក្នុងការដំណើរការម៉ាស៊ីន ដែលធ្វើឱ្យប្រេងម៉ាស៊ីនហូរយ៉ាងលឿនរហ័សទៅរំអិលដល់គ្រឿងមេកានិចផ្សេងៗ ក្រោយពេលដេរបញ្ឆេះរថយន្តភ្លាមៗ ត្រឹមតែ ២០ ទៅ ៣០វិនាទីប៉ុណ្ណោះ។
ខុសពីរថយន្តចាស់ៗដែលផលិតនៅមុនទសវត្សរ៍ទី៩០ ដែលម៉ាស៊ីនប្រើបេនសាំង។ ម៉ាស៊ីនបេនសាំងនេះ គឺត្រូវការបញ្ឆេះចោលឱ្យវាក្តៅបន្តិចសិន ដោយត្រូវចំណាយពេលរង់ចាំយ៉ាងហោចណាស់ ឱ្យបាន ១០នាទីសិនដែរ ទម្រាំអាចឱ្យខ្យល់ឆេះលាយជាមួយសាំងបាន ទើបអាចឱ្យប្រេងម៉ាស៊ីនបានហូរចូលជ្រាបដល់គ្រឿងបង្គុំផ្សេងៗ៕
ដកស្រង់ពី៖Sabay