ក្ដុកក្ដួល! ខេម រៀប​រាប់​រឿង​កម្សត់​កម្រ ដែល​នាំ​ឲ្យ​ខ្លួន​ដឹង​គុណ យូឌីស្កូ ដល់​សព្វ​ថ្ងៃ

សេចក្ដីលម្អិត

ជំពូក៖ ព័ត៌មានផ្សេងៗ

ក្នុងសមាគមសិល្បករទាំងមូល អ្នកនាង ចន ច័ន្ទលក្ខិណា បាននិយាយថា តារាចម្រៀង ខេម គឺជាអ្នកដែលឈឺឆ្អាល និងដុតដៃដុតជើងជាងគេ ក្នុងការបំផុសឲ្យមាន ការបង្កើតមូលនិធិសម្រាប់ជួយព្យាបាល ជំងឺរបស់លោក យូឌីស្កូ។

ជុំវិញរឿងរ៉ាវនេះត្រូវបាន ខេម ផ្ទាល់ អះអាងក្នុងវីដេអូផ្សាយផ្ទាល់ថា នេះដោយសារលោកនឹកគុណដល់ រៀមច្បងធ្លាប់ជួយលោកកន្លងមក។ 

តារាសំឡេងស្អករម្លឹកថា កាលពីឆ្នាំពី២០០៧ ពោលគឺក្រោយលោកជាប់ជយលាភីក្នុងកម្មវិធី Boy Band លោកបានជួបប្រទះគ្រោះថ្នាក់ចរាចរណ៍មួយលើស្ពានអាកាសក្បាលថ្នល់ដែលកាលណោះ គឺលោក យូឌីស្កូ នេះហើយដែលជួយមើលថែ និងទំនុកបម្រុងទម្រាំខ្លួនជាសះស្បើយឡើងវិញ។

“កាលជាប់ជយលាភីដំបូងៗ ជីវភាពខ្ញុំពិបាកណាស់ តែពេលនោះមានបង យូ ឌីស្កូ បានទិញអាហារមកសួរសុខទុក្ខមើលថែ ហើយខ្ញុំទំពាអាហារមិនបាន គាត់យកម៉ាស៊ីនទឹកក្រឡុក មកកិនឲ្យហូបទៀត ដែលពេលនោះខ្ញុំមិនទាន់ល្បីផង គឺពិតជារំភើបណាស់ ដែលគាត់ធ្វើបែបនេះចំពោះខ្ញុំ"។ ខេម រៀបរាប់។

ជាមួយការបង្កើតមូលនិធិនេះ លោកសង្ឃឹមថាសប្បុរសជន ទាំងឡាយអាចជួយគ្នាមួយដៃមួយជើង ដើម្បីផ្គត់ផ្គង់លើការចំណាយព្យាបាល តារាចម្រៀងចាស់វស្សានេះបាន ត្បិតលោកពិតជាស្ដាយអ្នកមានសមត្ថភាពរូបនេះណាស់។

• អានរបៀបបរិច្ចាគប្រាក់ជូន យូឌីស្កូ

លោក យូ ឌីស្កូ គឺជាអតីតមេក្រុម ចម្រៀងតោមាស ក្នុងផលិតកម្មរ៉ៃមាស និងជាតារាបង្ហាញ ម៉ូដប្រុសដ៏ល្បីប្រចាំ ព្រះរាជាណាចក្រកម្ពុជា។ លោកបានធ្លាក់ខ្លួនឈឺធ្ងន់ តាំងពីចុងឆ្នាំ២០១៧ ដោយជំងឺទឹកនោមប្រៃ និងខូចក្រលៀនទាំងសងខាង ដែលតម្រូវឲ្យលោកលាងឈាមជារៀងរាល់២ដងក្នុងមួយសប្ដាហ៍។ នៅវេលាខ្សោះខ្សោយនេះ មេគ្រួសារដែលមានម្ដាយ និងប្អូនជាច្រើននាក់នេះ ត្រូវការប្រាក់ចំនួន ៥ម៉ឺនដុល្លារសម្រាប់ ទៅព្យាបាលនៅប្រទេសឥណ្ឌា៕

ដកស្រង់ពី៖ Sabay