អភិបាលខេត្តត្បូងឃ្មុំ នាំយកអំណោយសាខាកាកបាទក្រហមខេត្ត និងថវិការផ្ទាល់ខ្លួន ទៅចែកជូនពលរដ្ឋរងគ្រោះដោយខ្យល់កន្ត្រាក់ ចំនួន១១៣គ្រួសារ នៅស្រុកមេមត់

សេចក្ដីលម្អិត

ជំពូក៖ ព័ត៌មានខេត្ត

បន្ទាប់ពីភ្លៀងមានលាយខ្យល់កន្ត្រាក់ រយៈពេល២ថ្ងៃ ចាប់ពីថ្ងៃទី០១ និងថ្ងៃទី០២ ខែឧសភាឆ្នាំ២០១៩នេះកន្លងទៅ បានជះឥទ្ធិពលគ្របដណ្តប់គ្រប់ក្រុងស្រុក ក្នុងខេត្តត្បូងឃ្មុំ ធ្វើអោយប្រជាពលរដ្ឋប្រមាណជាង១៦៥គ្រួសារ ទទួលរងផលប៉ះពាល់ដោយប៉ើងតំបូល និងរលំផ្ទះ ក៍ដូចជាវត្តអារាម សាលារៀន និងផលដំណាំនានា របស់ប្រជាពលរដ្ឋត្រូវបាក់ និងរំលើងឬសខ្ទេចខ្ទី ក្នុងនោះស្រុកមេមត់រងគ្រោះច្រើនជាងគេ មានរហូតដល់១១៣គ្រួសារ ព្រមទាំងចំការកៅស៊ូខូចខាតប្រមាណ ១ពាន់ហិចតា និងចំការស្វាយចន្ទីមួយចំនួនធំផងដែរ។

ឆ្លើយតបនូវតំរូវការរបស់ពលរដ្ឋ សាខាកាកបាទក្រហមខេត្ត ភ្លាមៗ បាននាំយកថវិការ និងស្បៀងអាហារសង្គ្រោះបន្ទាន់ផ្តល់ជូនពលរដ្ឋ ជាបន្តបន្ទាប់ ដោយឡែកនាថ្ងៃទី០៥ ខែឧសភា ឆ្នាំ២០១៩នេះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងលោកជំទាវ រួមទាំងលោកជំទាវ ឡេង សុខា ប្រធានស្តីទីសាខាកាកបាទក្រហមខេត្តត្បូងឃ្មុំ បាននាំយកថវិការ និងអំណោយកាកបាទក្រហមខេត្ត ក៍ដូចជាថវិការផ្ទាល់ខ្លួន របស់ឯកឧត្តមបណ្ឌិត អភិបាលខេត្ត ទៅចែកជូនប្រជាពលរដ្ឋ១១៣គ្រួសារ ដែលរងគ្រោះមហន្តរាយដោយធម្មជាតិនេះ ដែលជាការឆ្លើយតបទៅនឹងការងារមនុស្សធម៍ ក៍ដូចជាស្របតាមពាក្យស្លោករបស់កាកបាទក្រហមកម្ពុជា “ទីណាមានទុក្ខ ទីនោះមានកាកបាទក្រហមកម្ពុជា សម្រាប់គ្រប់ៗគ្នាស្មើៗគ្នា គ្រប់ពេលវេលា គ្រប់ទីកន្លែង ដោយមិនរើសអើងនោះឡើយ”។

ក្នុងឳកាសនោះ ឯកឧត្តមបណ្ឌិត ជាម ច័ន្ទសោភ័ណ បានសំណេះសំណាល និងសម្តែងនូវការសោកស្តាយ ក៍ដូចជាពាំនាំនូវប្រសាសន៍ផ្តាំផ្ញើរ សាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូន ដែលរងគ្រោះទាំងអស់ ដោយក្តីនឹករលឹក និងអាណិតអាសូរបំផុត។

ឯកឧត្តមបណ្ឌិត អភិបាលខេត្ត ថ្លែងថា អំណោយចែកជូនបងប្អូន ពេលនេះ គឺដើម្បីជួយសម្រួលនូវតំរូវការចាំបាច់របស់បងប្អូន ជាមួយគ្នានោះ ក៍បានផ្តាំផ្ញើរ ដល់បងប្អូនពលរដ្ឋទាំងអស់បង្កើនការប្រុងប្រយ័ត្នខ្ពស់បំផុត នូវការបំរែបំរួលអាកាសធាតុ ពិសេសត្រូវថែរក្សាសុខភាពអោយបានល្អ ដោយផឹកស្អាត ហូបស្អាត និងរស់នៅស្អាត។

ជាមួយគ្នានោះ ឯកឧត្តម ក៍បានស្នើរអោយកម្លាំងប្រដាប់អាវុធទាំង៣ប្រភេទ រួមទាំងក្រុមការងារ ចុះជួយរៀបចំផ្ទះសម្បែងប្រជាពលរដ្ឋឡើងវិញ ពិសេសវិទ្យាល័យដារ ដែលប៉ើងដំបូលខូចខាតនោះ ត្រូវជួសជុលឡើងវិញជាបន្ទាន់ សម្រាប់អោយក្មួយៗសិស្សានុសិស្ស បន្តការរៀនសូត្រជាធម្មតាវិញផងដែរ។

លោក រស់ សាខន នាយកប្រតិបត្តិសាខាកាកបាទក្រហមខេត្តត្បូងឃ្មុំ ឲ្យដឹងថា ចំពោះអំណោយដែលចែកជូននាពេលនោះទាំង១១៣គ្រួសារ ក្នុង១គ្រួសារៗទទួលបាន អង្ករ២៥គីឡូក្រាម, មី១កេស, ត្រីខ១យួរ, ទឹកត្រី១យួរ, ទឹកស៊ីអ៊ីវ១យួរ, ទឹកសុទ្ធ១កេស, តង់១ និងថវិការ១០ម៉ឺនរៀល សម្រាប់ផ្ទះ៨៧ខ្នង ខូចខាតតិចតួច និងថវិការ២០ម៉ឺនរៀលសម្រាប់គ្រួសារខូខាតធ្ងន់ធ្ងរ២៦គ្រួសារ ជាមួយគ្នានោះ ឯកឧត្តមបណ្ឌិត អភិបាលខេត្ត បានផ្តល់ថវិការផ្ទាល់ខ្លួន សម្រាប់គ្រួសាររងគ្រោះតិចតួច ១០ម៉ឺនរៀល ក្នុង១គ្រួសារ និង២០ម៉ឺនរៀល ក្នុង១គ្រួសារៗ ដែលរងគ្រោះធ្ងន់ធ្ងរ បន្ថែមពីលើថវិការរបស់សាខាកាកបាទក្រហមខេត្តផងដែរ ៕