មន្ត្រីសាលាខេត្តត្បូងឃ្មុំទាំងអស់ ធ្វើការជាធម្មតានៅថ្ងៃចូលឆ្នាំខ្មែរ៖ អភិបាលខេត្ត សំណេះសំណាល លើកទឹកចិត្តមន្ត្រី ចែកជូនថវិការ ប្រេងសាំង ក្រមា អាកុល និងម៉ាស់មួយចំនួន!!

សេចក្ដីលម្អិត

ជំពូក៖ ព័ត៌មានខេត្ត

ដើម្បីលើកទឹកចិត្តមន្ត្រីរាជការគ្រប់លំដាប់ថ្នាក់ នៃសាលាខេត្តត្បូងឃ្មុំទាំងអស់ ដែលបានខិតខំបំពេញភារកិច្ចការងារយ៉ាងសស្រាក់សស្រាំនាពេលកន្លងមក ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរនេះ

ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ និងលោកជំទាវ ម៉េង វ៉ាន់ដានីន បានអញ្ជើញជួបសំណេះសំណាល និងលើកទឹកចិត្តដោយចែកជូនថវិការ និងប្រេងសាំងមួយចំនួន។

បន្ថែមលើសពីនេះ ឯកឧត្តមបណ្ឌិត ក៏បានចែកជូននូវក្រមាដែលមានបក្សអក្សរនិងlogo ខេត្តត្បូងឃ្មុំ ម៉ាស់ និងអាកុលលាងដៃមួយចំនួន ដើម្បីការពារខ្លួនផង និងចូលរួមបង្ការ ទប់ស្កាត់ការរីករាលដាលជំងឺកូវីដ១៩។

ក្នុងឱកាសនោះ ឯកឧត្តមបណ្ឌិត ជាមច័ន្ទសោភ័ណ បានថ្លែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់មន្ត្រីសាលាខេត្តត្បូងឃ្មុំទាំងអស់ និងណែនាំបន្តសាមគ្គីភាពផ្ទៃក្នុង ខិតខំបំពេញភារកិច្ចការងាររៀងៗខ្លួន ដោយឈរលើគោលដៅដែលខ្លួនមាន ត្រូវមានអាកប្បកិរិយាល្អសមរម្យជាមន្ត្រីបំរើរាស្ត្រ បន្តរៀនសូត្រពីគ្រប់មជ្ឈដ្ឋានជុំវិញខ្លួន ដោយដាក់ខ្លួនឲ្យទាប ដូចសុភាសិតមួយបានលើកឡើងថា«ងើយស្កក ឱនដាក់គ្រាប់» ដែលលោកឪពុកលោក តែងតែប្រៀនប្រដៅ ចង់ចាំនៅក្នុងចិត្តតាំងពីតូចរហូតមកដល់បច្ចុប្បន្ននេះ ។

ឯកឧត្តមបណ្ឌិត បានគូសបង្ហាញថា អាកប្បកិរិយា ចំណេះដឹង និងទំនាក់ទំនង សំខាន់បំផុតសម្រាប់សម្រេចការងារ នាពេលបច្ចុប្បន្ន និងទៅកាន់អនាគត ដោយកុំមើលមើលស្រាលនូវតួនាទី និងអ្វីដែលខ្លួនមាននៅពេលបច្ចុប្បន្ននេះ។

ជាក់ស្ដែងដូចរូបឯកឧត្តមជាដើម ពីមន្ត្រីរាជការធម្មតា បន្តឡើងអនុប្រធានការិយាល័យ អនុប្រធានមន្ទីរ ប្រធានមន្ទីររហូតឡើងជាអភិបាលរងខេត្ត និងអភិបាលខេត្តនៅពេលបច្ចុប្បន្ននេះ ទាំងនេះជាកិច្ចខិតខំប្រឹងប្រែងតាមឋានានុក្រមលំដាប់ថ្នាក់ ដែលឯកឧត្តធ្លាប់បានឆ្លងកាត់ ។

ជាមួយគ្នានោះដែរ ឯកឧត្តមបណ្ឌិត ជាម ច័ន្ទសោភ័ណ និងមន្ត្រីរាជការសាលាខេត្តត្បូងឃ្មុំទាំងអស់ នៅថ្ងៃចូលឆ្នាំថ្មីប្រពៃណីជាតិខ្មែរខាងមុខនេះ គឺនៅធ្វើការងារជាធម្មតា ដោយមិនមានឈប់សម្រាកនោះឡើយ ដើម្បីរួមគ្នាជាមួយសម្ដេចតេជោហ៊ុនសែន ជាមួយរាជរដ្ឋាភិបាលកម្ពុជា ជាមួយប្រជាជនទូទាំងប្រទេស រួមគ្នាប្រយុទ្ធនឹងជំងឺកូវីដ១៩ ដោយស្របតាមពាក្យស្លោក៖ «ខ្ញុំចូលរួមប្រយុទ្ធប្រឆាំងនឹងជំងឺកូវីដដោយមកត្រូវការជាធម្មតានៅថ្ងៃចូលឆ្នាំនេះ, ចង់ឈ្នះកូវីដ នាំគ្នាធ្វើការងារធម្មតាក្នុងថ្ងៃចូលឆ្នាំនេះ, ខ្ញុំសុំផ្អាកចូលឆ្នាំមួយឆ្នាំសិនដើម្បីការពារជីវិតខ្ញុំ និងគ្រួសារជាទីស្រឡាញ់របស់ខ្ញុំ»។

ជាមួយគ្នានោះ លោកជំទាវ ម៉េង វ៉ាន់ ដានីន ប្រធានកិត្តិយសសមាគមន៍នារីដើម្បីសន្តិភាព និងការអភិវឌ្ឍន៍ខេត្តត្បូងឃ្មុំ បានប្រគល់ជូនថវិការមួយចំនួនដល់សមាគន៍ ដើម្បីទ្រទង់លើកិច្ចការងារនាឆ្នាំថ្មីនេះផងដែរ។