ចប់ត្រឹមសម្រេចហើយ តែធាក់អត់ឆេះ មិនអស់ចិត្តអូសម៉ូតូរត់… តាមទាន់ឃើញស្តែង
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ពិតជាស៊យធំមែន បន្ទាប់ពីធ្វើសកម្មភាពលួចកាច់សោ.កម៉ូតូគុបចង្កៀងជ្រុ១ងគ្រឿងបានសម្រេចហើយជិះមិនរួច ព្រោះធាក់អត់ឆេះ ប៉ុន្តែជននេះក៏មិនបោះបង់ម៉ូតូនេះចោលឡើយ បំណាច់នឹងលួចបានហើយក៏នៅតែព្យាយាមអូសរត់គេចខ្លួនទៀត ប៉ុន្តែត្រូវអស់លក្ខណ៍ដោយត្រូវម្ចាស់តាមទាន់ស្រែកឆោឡោបង្កឲ្យមានការភ្ញាក់ផ្អើលដល់អ្នកភូមិចេញមកជួយឃាត់ខ្លួនតែម្ដង បង្កឲ្យមានការភ្ញាក់ផ្អើលកាលពីម៉ោង៨ព្រឹក ថ្ងៃទី២៩ ខែកក្កដា ឆ្នាំ២០១៩ ស្ថិតនៅចំណុចផ្ទះលេខ2E0 ក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ។
នគរបាលឲ្យដឹងថា ជនសង្ស័យខាងលើនោះឈ្មោះ យូ មករា អាយុ១៨ឆ្នាំ មានទីលំនៅក្នុងភូមិត្រពាំងថ្លឹង២ សង្កាត់ចោមចៅ១ ខណ្ឌពោធិ៍សែនជ័យ បានលួចយកម៉ូតូ១គ្រឿងម៉ាកគុបចង្កៀងជ្រុង ស៊េរីឆ្នាំ១៩៩៦ ពណ៌ទឹកប៊ិច ពាក់ស្លាកលេខ ដ-4919 ភព1 របស់បុរសម្នាក់ឈ្មោះអ៊ុំ ភារិទ្ធិ អាយុ៤៩ឆ្នាំ មុខរបរបុគ្គលិករោងចក្រកាត់ដេរ មានទីលំនៅផ្ទះលេខ២អឺ០ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ។
ប្រភពដដែលបន្តថា មុនកើតហេតុ បុរសរងគ្រោះបានទុកម៉ូតូនៅមុខផ្ទះ ពេលនោះជនសង្ស័យចូលទៅធ្វើសកម្មភាពលួចកាច់សោ.កម៉ូតូ ហើយជនរងគ្រោះក៏មិនបានដឹងភ្លាមៗនោះឡើយ ។ លុះក្រោយមកទើបដឹងថា បាត់ម៉ូតូ ហើយក៏មិនដឹងថា ចោរស្ថិតនៅកន្លែងណាដែរ បន្ទាប់មកគាតក៏ចេញតាមរក ស្រាប់តែប្រទះឃើញជនសង្ស័យរូបនោះកំពុងអូសម៉ូតូរបស់គាត់រត់បានចម្ងាយប្រមាណ៣០០ម៉ត្រពីផ្ទះរបស់គាត់ ដោយសារតែក្រោយលួចបានធាក់បញ្ឆេះមិនឆេះ ទើបជនសង្ស័យនោះអូសរត់តែម្តង។
ប្រភពខាងលើបានបញ្ជាក់បន្ថែមទៀតថា បន្ទាប់ពីឃើញបែបនេះ គាត់ក៏បានស្រែកថា «ចោៗ» បង្កឲ្យមានការភ្ញាក់ផ្អើលយ៉ាងខ្លាំង ហើយអ្នកភូមិក៏ជួយដេញតាមចាប់បានភ្លាមៗ ព្រមទាំងយកម៉ូតូមកវិញ។ បន្ទាបមកទៀតក៏បាននាំជនសង្ស័យរូបនោះទៅប្រគល់ជូននគរបាលប៉ុស្តិ៍ចោមចៅ១ សាកសួរ ព្រមទាំងដាក់ពាក្យប្ដឹងសុំឲ្យចាត់ការតាមច្បាប់តែម្ដង។
ដកស្រង់ពី៏៖កោះសន្តិភាព