តុលាការសម្រេចឃុំខ្លួនក្រុមចោរជនជាតិវៀតណាម សកម្មខាងលួចផ្លាកលេខរថយន្ត២នាក់

សេចក្ដីលម្អិត

ជំពូក៖ ព័ត៌មានសន្តិសុខសង្គម

(ភ្នំពេញ)៖ ក្រុមចោរដែលមានជំនាញ ខាងលួចផ្លាកលេខរថយន្តមិនរើសម៉ាក២នាក់ ត្រូវបានតុលាការសម្រេចឃុំខ្លួន នៅពន្ធនាគារព្រៃសម១។ នេះបើតាមមន្ដ្រីតុលាការ ថ្លែងប្រាប់ភ្នាក់ងារព័ត៌មាន Fresh News ឲ្យដឹងនៅព្រឹកថ្ងៃទី២៥ ខែសីហា ឆ្នាំ២០១៩។

បើតាមសេចក្ដីរាយការណ៍ សម្រាប់អ្នកទទួលផលចោរកម្ម ឈ្មោះ សេន សឿន ហៅតាម៉ាប់ ភេទប្រុស អាយុ៤៩ឆ្នាំ ក្រោយពីបញ្ចប់ការសួរនាំ ត្រូវបានលោក រស់ សាម៉ឺឌី ចៅក្រមស៊ើបសួរ នៃសាលាដំបូងរាជធានីភ្នំពេញ អនុញ្ញាតឲ្យត្រឡប់ទៅផ្ទះវិញជាបណ្ដោះអាសន្ន រងចាំការសួរនាំ និងបន្ដនីតិវិធីនៅពេលក្រោយ។ ចំណែកជនត្រូវចោទ ដែលត្រូវឃុំខ្លួនរួមមាន ឈ្មោះ សុខ ជា ហៅ យឿង ភេទប្រុស អាយុ២២ឆ្នាំ ជនជាតិវៀតណាម និងឈ្មោះ ម៉ែន វិចិត្រ ភេទប្រុស អាយុ២៨ឆ្នាំ ជនជាតិវៀតណាម ។

ក្រុមជនត្រូវចោទត្រូវបានលោក សេង គីមឡាក់ ជាតំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ និងចោទប្រកាន់ទៅឲ្យលោក រស់ សាម៉ឺឌី ជាចៅក្រមស៊ើបសួរចាត់ការតាមច្បាប់។

គួររម្លឹកថា ក្រុមជនត្រូវចោទទាំង៣នាក់ខាងលើ ត្រូវកម្លាំងនគរបាលខណ្ឌទួលគោក ឃាត់ខ្លួនភ្លាមៗ កាលយប់ថ្ងៃទី២០ ខែសីហា ឆ្នាំ២០១៩ បន្ទាប់ពីពួកគេធ្វើសកម្មភាព លួចផ្លាកលេខរថយន្តម៉ាកព្រូស និងបទទទួលផលចោរកម្ម ប្រព្រឹត្តនៅចំណុចមុខផ្ទះលេខ២A ផ្លូវលេខ៣៩៥ ក្រុមទី៣០ ភូមិ១១ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ៕

ដកស្រង់ពីៈ៖FRESH NEWS