ឆ្មក់ចូលបារបារាំងមួយកន្លែងក្នុងសង្កាត់វត្តភ្នំ ប្រមូលទាំងនារីជាបុគ្គលិកនិងថៅកែ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ សមត្ថកិច្ចនាយកដ្ឋានប្រឆាំងការជួញដូរផ្លូវភេទនិងការពារអនីតិជនបានចុះទៅធ្វើការឃាត់ខ្លួនស្ត្រីធ្វើការក្នុងបារបារាំងមួយកន្លែងបង្កប់នូវសេវាផ្លូវភេទបានចំនួន៨នាក់ រួមនឹងថៅកែហាងម្នាក់ជាជនជាតិអូស្ត្រាលីយកទៅសួរនាំ ។
ហេតុការណ៍ខាងលើនេះបានកើតឡើងកាលពីវេលាម៉ោង១០យប់ថ្ងៃទី២៦ ខែសីហា ឆ្នាំ២០១៩ តាមបណ្តោយផ្លូវ១០៤ នៅចំណុចបារបារាំងយីហោ បាន់ នី ស្ថិតនៅក្នុងសង្កាត់វត្តភ្នំ ខណ្ឌដូនពេញ ។ស្ត្រីទាំង៨នាក់ដែលបម្រើការក្នុងបារបារាំងខាងលើ មិនត្រូវបានស្គាល់អត្តសញ្ញាណនោះទេ ។ ចំណែកថៅកែបារបារាំងខាងលើឈ្មោះចន ភេទប្រុស អាយុ៧២ឆ្នាំ ជាជនជាតិអូស្ត្រាលី ។
តាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ នាយកដ្ឋានប្រឆាំងបទល្មើសការជួញដូរផ្លូវភេទនិងការពារអនីតិជននៃអគ្គស្នងការរាជធានារីភ្នពេញបានធ្វើការស្រាវជ្រាវស៊ើបអង្កេតជាយូរមកហើយនូវទីតាំងបារបារាំងយីហោ បាន់នី ខាងលើនេះដែលមានបង្កប់នូវសេវាផ្លូវភេទនៅខាងជាន់លើ ទើបកម្លាំងនាយកដ្ឋានការប្រឆាំងការជួញដូរផ្លូវភេទ បានចុះប្រតិបត្តិការធ្វើការឃាត់ខ្លួនស្ត្រីជាបុគ្គលិកចំនួន៨នាក់ រួមនឹងថៅកែម្នាក់ជាជនជាតិអូស្ត្រាលីយកទៅសួរនាំ ហើយថែមទាំងដកហូតបានវត្ថុតាងដូចជាស្រោមអនាម័យមួយចំនួនផងដែរ ។
ក្រោយពេលកើតហេតុ នារីជាបុគ្គលិកទាំង៨នាក់ រួមនឹងថៅកែជាជនជាតិអូស្ត្រាលីត្រូវបានសមត្ថកិច្ច កសាងសំណុំរឿងបញ្ចូនទៅកាន់តុលាការទៅតាមនីតិវិធី ៕
ដកស្រង់ពី៖កោះសន្តិភាព