ខ្មាន់កាំភ្លើងចិនបាញ់សម្លាប់ចិនដូចគ្នា…ចាប់បាន២នាក់ទៀត
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តព្រះសីហនុ ៖ ខ្មាន់កាំភ្លើងជនជាតិចិន ដែលបាញ់សម្លាប់ចិនដូចគ្នានៅកណ្ដាលក្រុងព្រះសីហនុ កាលពីថ្ងៃទី៦ តុលាកន្លងទៅនៅពេលនេះ កម្លាំងនគរបាលតាមស្រាវជ្រាវ និងចាប់ខ្លួនបាន២នាក់បន្ថែមទៀត ។
មន្ដ្រីនគរបាលខេត្តព្រះសីហនុបានឲ្យដឹងនៅរសៀលថ្ងៃទី១១ តុលាថា ខ្មាន់កាំភ្លើង៤នាក់ដែលបាញ់សម្លាប់ជនជាតិចិនដូចគ្នា ត្រូវកម្លាំងជំនាញចាប់ខ្លួនបាន២នាក់បន្ថែមទៀត និងដកហូតបានកាំភ្លើងខ្លី ដែលជាវត្ថុតាងធ្វើសកម្មភាពមួយដើមផងដែរ ។ ពេលនេះកម្លាំងជំនាញកំពុងធ្វើការសួរនាំ និងស្រាវជ្រាវដើម្បីតាមចាប់បក្សពួកផ្សេងទៀត ដែលរួមគំនិតគ្នាទាក់ទិននឹងការបាញ់ប្រហារយ៉ាងឃោរឃៅ ។
សូមជម្រាបថា នៅវេលាម៉ោងជាង៨ព្រឹក ថ្ងៃទី៦ តុលា មានករណីជនជាតិចិន៣នាក់ បានចាប់អូសជនជាតិចិនម្នាក់ចេញពីរថយន្ត ហើយបាញ់សម្លាប់ភ្លាមៗ នៅលើដងផ្លូវក្នុងសង្កាត់លេខ៣ ក្រុងព្រះសីហនុ ។ ក្រោយកើតហេតុភ្លាមៗ សមត្ថកិច្ចនគរបាលខេត្តព្រះសីហនុ បានអន្តរាគមន៍ឃាត់ខ្លួនបានជនល្មើស ដែលជាជនជាតិចិន២នាក់ ក្នុងមនោះបុរសម្នាក់ និងនារីម្នាក់ ។ យ៉ាងណាក៏ដោយ សមត្ថកិច្ចមិនទាន់បញ្ជាក់លម្អិតអំពីមូលហេតុនៅឡើយទេ ។
មានការកត់សម្គាល់ថា កន្លងទៅនេះករណីឃាតកម្មដែលបង្កឡើងដោយជនជាតិចិនលើជនជាតិចិនដូចគ្នា បានកើតឡើងជាបន្តបន្ទាប់នៅខេត្តព្រះសីហនុ ខណៈដែលសមត្ថកិច្ចក៏បានបង្កើនការរឹតបន្តឹងសន្តិសុខ កាន់តែខ្លាំងក្លាផងដែរ ដោយសារថាមានករណីមួយចំនួនមិនទាន់ត្រូវបានវែកមុខនៅឡើយទេ ។
មហាជនបានធ្វើការកត់សម្គាល់ថា ករណីបាញ់ប្រហារដោយជនជាតិចិននេះ ពួកគេធ្វើឡើងដោយមិនរើសទីតាំងនោះទេ ខុសពីជនដៃដល់ខ្មែរដែលហ៊ានធ្វើតែកន្លែងស្ងាត់ទេ ចំណែកចិនសម្លាប់គ្នាឆៅៗលើដងផ្លូវដែលមានចរាចរណ៍អ៊ូរអរតែម្តង ។
លោក គួច ចំរើន អភិបាលខេត្តព្រះសីហនុ បានឧបត្ថម្ភថវិកាចំនួន១០លានរៀលជួនដល់នគរបាលដែលបំបែកសំណុំរឿងដើម្បីជាការលើកទឹកចិត្តដល់ប្រតិបត្តិការនេះនៅថ្ងៃទី១១ តុលា លោក គួច ចំរើន អភិបាលខេត្តព្រះសីហនុ បានឧបត្ថម្ភថវិកា ដល់កងនគរបាលខេត្តព្រះសីហនុ ចំនួន១០លានរៀល ។
គណៈស្នងការនៃស្នងការដ្ឋាននគរបាលខេត្តព្រះសីហនុ បានគោរពថ្លែងអំណរគុណយ៉ាងជ្រាលជ្រៅចំពោះ លោកអភិបាលខេត្តដែលផ្តល់ការលើកទឹកចិត្តដល់កងកម្លាំង ដែលកាយវិការនេះនឹងជំរុញលើកទឹកចិត្តដល់កងកម្លាំងកាន់តែបង្កើនសកម្មភាពមុតស្រួចប្រឆាំងនឹងបទល្មើសយ៉ាងពិតប្រាកដ ៕
ដកស្រង់ពី៖កោះសន្តិភាព