ជិះម៉ូតូគេចជង្ហុក ជ្រុលបុកខឿន ស្លាកសញ្ញាស្ថានីយ៍ ប្រេងតេលា បែកក្បាលស្លាប់

សេចក្ដីលម្អិត

ជំពូក៖ ព័ត៌មានសន្តិសុខសង្គម

ខេត្តកំពង់ចាម៖ យុវជនម្នាក់បានធ្វើដំណើរ ចាកចេញពី ស្រុកកំណើត នៅខេត្តតាកែវ មកលេងមិត្តភក្តិ នៅស្រុកចំការលើ ខេត្តកំពង់ចាម ហើយចៃដន្យ ពេលកំពុង ធ្វើដំណើរ ទៅលេងចំការ ក៏ដួលម៉ូតូបោកក្បាល ទៅលើខឿន រង្វង់មូលស្លាក សញ្ញាស្ថានីយ៍ ប្រេងតេលា បណ្តាលឲ្យស្លាប់ នៅនឹងកន្លែងកើតហេតុ កាលពីវេលាម៉ោង ៩និង៣០ នាទី ថ្ងៃទី៦ ខែសីហា ឆ្នាំ២០១៤ នៅចំណុចខឿន ស្ថានីយ៍ប្រេងតេលា ស្ថិតនៅភូមិអូរលើ ឃុំមេសជ្រៃ ស្រុកស្ទឹងត្រង់ ខេត្តកំពង់ចាម។

ជនរងគ្រោះ មានឈ្មោះ ចាវ ភេទប្រុស អាយុ ២២ឆ្នាំ មានទីលំនៅ ក្នុងខេត្តតាកែវ បានជិះម៉ូតូម៉ាកវ៉េវអាល់ហ្វា ពណ៌ខៀវ ចេញពីស្រុកកំណើត មកលេងមិត្តភក្តិ នៅភូមិត្រពាំងឬស្សី ឃុំជយោ ស្រុកចំការលើ ខេត្តកំពង់ចាម កាលពីថ្ងៃទី៥ ខែសីហា ឆ្នាំ២០១៤។ នៅពេលបាន ជួបមិត្តភក្តិ ក៏បបួលគ្នាទៅលេងចំការ នៅក្នុងភូមិសាស្ត្រ ស្រុកស្ទឹងត្រង់ ដោយធ្វើដំណើរ ចេញពី ស្រុកចំការលើ នៅព្រឹកថ្ងៃទី៦ ខែសីហា ឆ្នាំ២០១៤។

នៅពេលត្រឡប់មកវិញ ឈ្មោះ ចាវ បានជិះម៉ូតូរបស់ខ្លួន ដោយបើក ក្នុងល្បឿនយ៉ាងលឿន ពេលមកដល់ កន្លែងកើតហេតុ ឈ្មោះ ចាវ បានគេចជង្ហុក ស្រាប់តែដួលបោកក្បាល ទៅលើខឿន ដាក់ស្លាកយីហោ ស្ថានីយ៍ប្រេងតេលា បណ្តាលឲ្យបែកក្បាល ហូរឈាម ស្លាប់ភ្លាមៗ គួរឲ្យសង្វេគបំផុត។ ក្រោយពេលកើតហេតុ សមត្ថកិច្ចក៏បានពិនិត្យរួច ទើបប្រគល់សពជនរងគ្រោះ ឲ្យក្រុមគ្រួសារ យកទៅធ្វើបុណ្យ នៅស្រុកចំការលើ៕

ដកស្រង់ពី៖ គេហទំព័រវត្ដភ្នំ