ចុះឆ្មក់បានជិត១០នាក់ ក្រោយប្រជាពល រដ្ឋរាយការណ៍
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ សមត្ថកិច្ចមន្ទីរប្រឆាំងគ្រឿងញៀននៃស្នងការរាជធានីភ្នំពេញបានធ្វើការស្រាវជ្រាវនិងឃាត់ខ្លួនជនសង្ស័យចំនួន៨នាក់ជាអ្នកប្រើប្រាស់និងជួញដូរថ្នាំញៀន ក្នុងនោះមានស្ត្រីចំនួន២នាក់ផងដែរ។
ប្រតិបត្តិការចុះឃាត់ខ្លួនជនសង្ស័យក្នុងករណីខាងលើបានធ្វើឡើងកាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃទី១៧ ខែធ្នូ ឆ្នាំ២០១៩ នៅចំណុចរ៉ារថភ្លើង តាមបណ្តោយផ្លូវទំនប់៧០ ស្ថិតក្នុងសង្កាត់ទួលសង្កែទី១ ខណ្ឌឫស្សីកែវ ។
ជនសង្ស័យទាំង៨នាក់ខាងលើនេះមិនស្គាល់អត្តសញ្ញាណនោះទេ ។តាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុខាងលើនេះ ដោយមានប្រជាពលរដ្ឋទូរស័ព្ទរាយការណ៍ប្រាប់សមត្ថកិច្ចថា នៅចំណុចទីតាំងខាងលើនេះគឺជាកន្លែងលេងល្បែងហ្គេមបាញ់ត្រី ថែមទាំងប្រើប្រាស់ និងជួញដូរថ្នាំញៀនយ៉ាងសកម្មទៀតនោះ ។
តាមប្រភពដដែលបានបន្តថា បន្ទាប់ពីទទួលបានសេចក្តីរាយការណ៍ខាងលើភ្លាម ទើបខាងកម្លាំងមន្ទីរប្រឆាំងគ្រឿងញៀននៃស្នងការរាជធានីភ្នំពេញបានធ្វើការស្រាវជ្រាវនិងចុះពិនិត្យរហូតឈានទៅដល់ឃាត់ខ្លួនជនសង្ស័យចំនួន៨នាក់ ក្នុងនោះមាន២នាក់ជាស្ត្រី និងដកហូតបានវត្ថុតាងដូចជា ថ្នាំញៀនចំនួន៤កញ្ចប់ ក្នុងនោះ៣កញ្ចប់តូច និងមួយកញ្ចប់ធំ, ដាវសាំម៉ូវៃចំនួន៣ដើម, ពូថៅចំនួន២ដើម និងឧបករណ៍សំរាប់ជក់ចំនួន៣ផងដែរ យកទៅសួរនាំបន្តនៅឯមន្ទីរប្រឆាំងគ្រឿងញៀននៃស្នងការរាជធានីភ្នំពេញ និងចាត់ការតាមនីតិវិធី ។
ក្រោយពេលកើតហេតុ ជនសង្ស័យទាំង៨នាក់ខាងលើត្រូវបានសមត្ថកិច្ចកសាងសំណុំរឿងបញ្ជូនទៅកាន់តុលាការដើម្បីចាត់ការតាមនីតិវិធី ៕
ដកស្រង់ពី៖កោះសន្តិភាព