ចុះឆ្មក់ដល់បន្ទប់ជួលស្ត្រីវៀតណាម៣នាក់ទាំងយប់ បែកធ្លាយខ្ទេច
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តសៀមរាប ៖ ស្ត្រីជនជាតិវៀតណាមចំនួន៣នាក់សង្ស័យលួចលក់ និងប្រើប្រាស់គ្រឿងញៀនក្នុងបន្ទប់ជួល ត្រូវសមត្ថកិច្ចនគរបាលចាប់ឃាត់ខ្លួនកាលពីវេលាម៉ោង៨យប់ថ្ងៃទី២៩ ខែមករា ឆ្នាំ២០២០ នៅចំណុចបន្ទប់ជួលមួយកន្លែង ក្នុងភូមិទក្សិណខាងត្បូង សង្កាត់គោកចក ក្រុងសៀមរាប។
តាមប្រភពពីសមត្ថកិច្ចនគរបាលជំនាញខេត្តបានប្រាប់ថា ស្ត្រីជាជនសង្ស័យទាំង៣នាក់ ខាងលើរួមមាន១-ឈ្មោះង្វៀង ធីញី ភេទស្រី អាយុ៣១ឆ្នាំ ជនជាតិវៀតណាម មុខរបរម៉ាស្សា (ជាអ្នករក្សាទុក ជួញដូរ និងប្រើប្រាស់គ្រឿងញៀន រកឃើញមានសារធាតុញៀនក្នុងខ្លួន), ២-ឈ្មោះឡេង ធីកេវវ៉ាន់ ភេទស្រី អាយុ២២ឆ្នាំ ជនជាតិវៀតណាម មុខរបរមិនពិតប្រាកដ (ជាអ្នកចាត់ចែង និងប្រើប្រាស់គ្រឿងញៀន រកឃើញមានសារធាតុញៀនក្នុងខ្លួន និង៣-ឈ្មោះហ្វាម ធីថាន់ហ្វឿង ហៅហ្វុង ភេទស្រី អាយុ២២ឆ្នាំ ជនជាតិវៀតណាម មុខរបរ មិនពិតប្រាកដ (ជាអ្នកចាត់ចែង និងប្រើប្រាស់គ្រឿងញៀន រកឃើញមានសារធាតុញៀនក្នុងខ្លួន) ។
ស្ត្រីជាជនសង្ស័យទាំង៣នាក់ខាងលើស្នាក់នៅបន្ទប់ជួលក្នុងភូមិឃុំកើតហេតុខាងលើ ។
ក្រោយពីធ្វើការឃាត់ខ្លួនស្ត្រីជាជនសង្ស័យទាំង៣នាក់រួចមក កម្លាំងជំនាញបានធ្វើការដកហូតវត្ថុតាងរួមមាន ម្ស៉ៅមេតំហ្វេតាមីនប្រភេទទឹកកកចំនួន១កញ្ចប់, ជញ្ជីងថ្លឹងគ្រឿងញៀនចំនួន១គ្រឿង, ឧបករណ៍ប្រើប្រាស់និងសំភារៈវេចខ្ចប់គ្រឿងញៀនមួយចំនួន និងទូរស័ព្ទដៃចំនួន៥គ្រឿង។
បច្ចុប្បន្ន ស្ត្រីជាជនសង្ស័យទាំង៣នាក់ និងវត្ថុតាងត្រូវបានសមត្ថកិច្ចនគរបាលជំនាញ បញ្ចូនទៅសាលាដំបូងខេត្តសៀមរាប ដើម្បីចាត់ការតាមនីតិវិធី ៕
ដកស្រង់ពី៖កោះសន្តិភាព