រថយន្តដឹកឈើល្មើសច្បាប់មួយគ្រឿង ត្រូវកម្លាំងចម្រុះបង្ក្រាបបាន
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តមណ្ឌលគិរី ៖ រថយន្តដឹកឈើល្មើសច្បាប់មួយគ្រឿង ត្រូវកម្លាំងចម្រុះបង្ក្រាបបាននាវេលាទៀបភ្លឺ ថ្ងៃទី២២ កក្កដា ២០២០ ក្រោយក្រុមឈ្មួញបានព្យាយាមដឹកជញ្ជូនឈើនោះចេញពីតំបន់ដែនជម្រកការពារសត្វព្រៃកែវសីមា។សមត្ថកិច្ចបានឲ្យដឹងថា នៅវេលាម៉ោង០៤ និង៤៥នាទីទៀបភ្លឺ ថ្ងៃទី២២ ខែកក្កដា ឆ្នាំ២០២០ គណៈបញ្ជាការ ឯកភាពស្រុកធ្វើការបង្ក្រាបបានរថយន្តដឹកឈើ០១គ្រឿងម៉ាកកាមរីឆ្លាម ពណ៌ទឹកប្រាក់ គ្មានស្លាកលេខ ដឹកឈើប្រភេទលេខ១(សុក្រំ)ចំនួន០៣ដុំ ក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី។
មុនពេលកើតហេតុកម្លាំងសមត្ថកិច្ចចម្រុះបានធ្វើការល្បាតតាមគោលដៅដែលជនល្មើសតែងតែធ្វើសកម្មភាពដឹកជញ្ជូនបទល្មើសព្រៃឈើ ក៏ប្រទះឃើញជនល្មើសដឹកឈើមកដល់ចំណុចខាងលើ ពេលនោះជនល្មើសបានឃើញរថយន្ត សមត្ថកិច្ច គេក៏បើករថយន្តគេបំបុករថយន្តរបស់ លោក ហឿន សុខណា អភិបាលរងស្រុកចំពីមុខដើម្បីរំដោះខ្លួន តែសំណាងមិនល្អទៅមុខមិនរួចត្រូវសមត្ថកិច្ចក្របួចជាប់តែម្តង។
សេចក្តីរាយការណ៍ថា ក្រោយព្យាយាមបើកឡាន ដឹកឈើបំបុកឡានសមត្ថកិច្ច អ្នកបើកបរឡានដឹកឈើបានរងរបួសធ្ងន់ ត្រូវបញ្ជូនទៅសង្គ្រោះជីវិតភ្លាមៗ។ ក្រោយចាប់បានរថយន្តដឹកឈើហើយនោះ នៅចំណុចជិតកន្លែងកើតហេតុសមត្ថកិច្ចបានរកឃើញផ្ទះមួយកន្លែងក្បែរនោះ មានស្តុកឈើជាច្រើនកំណាត់ និងបន្តបង្ក្រាបបានមួយករណីទៀត។
សេចក្តីរាយការណ៍បន្តថា នៅម៉ោង៩ និង២៣នាទី ថ្ងៃដដែល លោកព្រះរាជអាជ្ញារង អ៊ាង សុគន្ធ បញ្ជាឲ្យដឹកជញ្ជូនឈើ ចំនួន៣៤ដុំ គគីរ៦ដុំ សុក្រំ២៨ដុំ ដែលដឹកយកមកលាក់ទុកនៅក្រោយផ្ទះ ឈ្មោះ ណាង តែស៊ាន ភេទស្រី អាយុ៣៥ឆ្នាំ មុខរបរមិនពិតប្រាកដ រស់នៅភូមិឃុំខាងលើទៅរក្សាទុកនៅផ្នែករដ្ឋបាលព្រៃឈើកែវសីមា ដើម្បីបន្តនីតិវិធីច្បាប់៕
ដកស្រង់ពី៖កោះសន្តិភាព