បញ្ជូនខ្លួន ជនសង្ស័យប្រុសស្រី ៣នាក់ ទៅស្នងការនគរបាលខេត្ត ពីបទចែកចាយថ្នាំញៀន

សេចក្ដីលម្អិត

ជំពូក៖ ព័ត៌មានសន្តិសុខសង្គម

បាត់ដំបង៖ កម្លាំងនគរបាល ក្រុងបាត់ដំបង បានចាប់បញ្ជូនខ្លួន ជនសង្ស័យ ស្រី -ប្រុស ៣នាក់ ទៅស្នងការ ខេត្តពីបទ ចែកចាយថ្នាំញៀន បន្ទាប់ពីបានឃាត់ខ្លួន ជាបន្តបន្ទាប់ កាលពីវេលា១១ និង៤៥នាទី ថ្ងៃទី៨ ខែវិច្ឆិកា ឆ្នាំ២០១៤។

នៅចំណុចខាងលិច វត្តស្រែ១០០ ស្ថិតក្នុងក្រុមទី១៨ ភូមិជ្រៃកោង សង្កាត់ស្លាកែត ក្រុងបាត់ដំបង រួចកសាងសំណុំរឿង បញ្ជូនខ្លួន ទៅស្នងការខេត្ត ដើម្បីចាត់ការតាមច្បាប់ ។

លោក ស៊ន កុសល់ នាយផ្នែកព្រហ្មទណ្ឌ នគរបាលក្រុង បានឱ្យដឹងថា ជនសង្ស័យ ដែលសមត្ថកិច្ច បានឃាត់ ខ្លួន ៣នាក់ មាន៖ ទី១ឈ្មោះ គឿន ង៉ា ភេទប្រុសអាយុ ២០ឆ្នាំ រស់នៅភូមិ កំពង់ស្រម៉ ឃុំឈើទាល ស្រុកបាណន់ ។ ទី២ឈ្មោះ ឆ្លាំង ច័ន្ទនី ភេទប្រុស២០ឆ្នាំ នៅភូមិដូចគ្នា ។ ព្រមទាំងដកហូត បានម៉ាទឹកកក ថង់តូច ដែលគេទិញ ក្នុងតម្លៃ ១០ដុល្លារ ។

បន្ទាប់ពី បានឃាត់ខ្លួន ជនសង្ស័យ ២នាក់ ខាងលើនាំយកកុំ សាកសួរបាន ចម្លើយហើយ ទើបឈាន ទៅឃាត់ខ្លួន អ្នកលក់ម្នាក់ទៀត ឈ្មោះ ជុក ស្រីល័ក្ខ ភេទស្រីអាយុ ២៣ឆ្នាំ រស់នៅភូមិ ចំការសំរោង១ សង្កាក់ចំការសំរោង ក្រុង បាត់ដំបង នៅតាមដងផ្លូវ ខណៈពេល ស្រ្តីអ្នកលក់ថ្នាំញៀននេះ ជិះម៉ូតូយកថ្នាំញៀន មកឱ្យអ្នកទិញខាងលើភ្លាមៗនោះ ស្រ្តីរូបនេះ បានឃើញសមត្ថកិច្វ ក៏យកម៉ាទឹកកក ១ថង់តូចនោះ ដាក់ចូលមាត់ ខ្លួនរួចខាំទំពារ កម្ទេចថ្នាំញៀន រលាយអស់ ដើម្បីបំបាត់ភស្តុតាង តែទោះជាយ៉ាងណា សមត្ថកិច្ច ក៏បានឃាត់ខ្លួន នាំយកទៅអធិការ ដើម្បីសួរនាំ ។

ជនសង្ស័យទាំង ៣នាក់ បានឆ្លើយសារភាពថា បក្ខពួកខ្លួនពិតជា បានរកស៊ីចែកចាយ ថ្នាំញៀនពិតប្រាកដមែន ។ បច្ចុប្បន្នមន្រ្តីជំនាញ បានកសាងសំណុំរឿង បញ្ជូនខ្លួន និងវត្ថុតាង ទៅស្នងការខេត្ត ដើម្បីចាត់ការតាមច្បាប់ ៕