អាវុធហត្ថ ដុតកម្ទេចរថយន្ត០២គ្រឿង សម្រាប់ដឹកជញ្ជូនឈើ ក្នុងដែនជម្រកសត្វព្រៃភ្នំឱរ៉ាល់
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តពោធិ៍សាត់ ៖ កម្លាំងអាវុធហត្ថ នៅម៉ោង ០១និង៥៥នាទី រសៀលថ្ងៃទី១៥ ខែកក្កដា ឆ្នាំ២០២១នេះ បានដុតកម្ទេចចោលរថយន្តកែច្នៃ (រ៉េវ ឫបាកុង) ចំនួន ០២គ្រឿង នៅនឹងទីតាំង ស្ថិតព្រៃជ្រៅក្នុងតំបន់ការពារធម្មជាតិ ដែនជម្រកសត្វព្រៃភ្នំឱរ៉ាល់ ។
ការដុតកម្ទេចចោលរថយន្តទាំង០២គ្រឿងនេះ គឺយោងបទបញ្ជារបស់ នាយឧត្តមសេនីយ៍ សៅ សុខា ប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងដោយមានការឯកភាពពីសមត្ថកិច្ចជំនាញ ព្រះរាជអាជ្ញាអមសាលាដំបូងខេត្តពោធិ៍សាត់ និងអាជ្ញាធរដែនដី ។
សូមបញ្ជាក់ថា «អាវុធហត្ថ នឹងកម្ទេចចោលរថយន្ដបាកុង ២គ្រឿង ដែលប្រទះឃើញក្នុងដែនជម្រកសត្វព្រៃភ្នំឱរ៉ាល់» ដោយកម្លាំងចម្រុះបានចុះល្បាត ក៏ប្រទះឃើញរថយន្ដ រ៉េវ បាកុង ជាមធ្យោបាយដឹកជញ្ជូនឈើ ចំនួន២គ្រឿង ត្រូវបានបើកចូលជ្រៅទៅក្នុងតំបន់ការពារធម្មជាតិ ដែនជម្រកសត្វព្រៃភ្នំឱរ៉ាល់ ។
ប្រតិបត្តិការល្បាតរួមគ្នាខាងលើនេះ ធ្វើឡើងកាលពីវេលាម៉ោង១១និង០៥នាទីព្រឹកថ្ងៃទី១៤ ខែកក្កដា ឆ្នាំ២០២១នេះ ស្ថិតក្នុងដែនជម្រកសត្វព្រៃភ្នំឱរ៉ាល់ ឃុំសន្ទ្រែ ស្រុកភ្នំក្រវ៉ាញ ខេត្តពោធិ៍សាត់ ដោយកម្លាំងចម្រុះ រួមមាន កម្លាំងទីស្នាក់ការល្បាត ររៀង នៃកម្មវិធីការពារព្រៃឈើតំបន់ជួរភ្នំក្រវ៉ាញ កម្លាំងមន្ត្រីក្រសួងបរិស្ថាន កម្លាំងកងរាជអាវុធហត្ថលើផ្ទៃប្រទេស និងអង្គការសម្ព័ន្ធមិត្តសត្វព្រៃ ៕
ដកស្រង់ពី៖កោះសន្តិភាព