ចិន ៣៦នាក់ លួចឆ្លងដែនខុសច្បាប់តាមនាវា ១គ្រឿង ត្រូវចាប់បាននៅខេត្តព្រះសីហនុ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តព្រះសីហនុ៖ ជនជាតិចិន ៣៦នាក់ បានលួចឆ្លងដែនខុសច្បាប់ ជិះនាវា ១គ្រឿង ដោតទង់ជាតិកម្ពុជា ចេញពីខេត្តហ្វ៊ូចៀន ប្រទេសចិន ចូលមកកម្ពុជា ត្រូវចាប់បាន ក្នុងដែនសមុទ្រខេត្តព្រះសីហនុ កាលពីយប់ថ្ងៃទី២៤ ខែកក្កដា ឆ្នាំ២០២១។
របាយការណ៍ បង្ហាញថា នៅថ្ងៃទី២៤ ខែកក្កដា ឆ្នាំ២០២១ វេលាម៉ោង ២១ និង ៣០នាទី កម្លាំងអង្គភាពបង្ក្រាបបទល្មើសលើផ្ទៃសមុទ្រនៃនាយកដ្ឋាននគរបាលការពារព្រំដែនទឹក បានសហការជាមួយកម្លាំងកងទ័ពជើងទឹក ឃាត់ត្រួតពិនិត្យនាវាចិន ១គ្រឿង នៅចំណុចនិយាមកាលេខ ១០°៣៥-១០៣°២២។
ក្រោយធ្វើការត្រួតពិនិត្យ និងសាកសួរ ក្រុមនាវិក បានឲ្យដឹងថា នាវានេះ មានឈ្មោះ តុង ហាយ បានចាកចេញពីកំពង់ផែ ហ្វ៊ូអាន ខេត្តហ្វ៊ូចៀន ប្រទេសចិន នៅថ្ងៃទី១៨ ខែកក្កដា ឆ្នាំ២០២១។
របាយការណ៍ បង្ហាញថា នៅលើនាវានេះ មានជនជាតិចិន ៣៦នាក់ ( ស្រី ១១នាក់ ) និងជនជាតិខ្មែរ ២នាក់ ជាកម្មករ។ ករណីនេះ យើងបានរៀបចំឯកសារ បញ្ជូនទៅឲ្យជំនាញនៃអគ្គនាយកដ្ឋានអន្តោប្រវេសន៍ តាមបញ្ជាដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដើម្បីអនុវត្តតាមនីវិធីច្បាប់បន្ត៕
ដកស្រង់ពី៖កោះសន្តិភាព