កូនប្រុស យកកាំបិតប៉័ងតោ ដេញកាប់ម្តាយបង្កើត អាយុ ៨៨ឆ្នាំ នៅស្រុកត្រាំកក់

សេចក្ដីលម្អិត

ជំពូក៖ ព័ត៌មានសន្តិសុខសង្គម

តាកែវៈ កូនប្រុស បានយកកាំបិតប៉័ងតោ ដេញកាប់ម្តាយបង្កើត មានអាយុ ៨៨ ឆ្នាំ នៅស្រុកត្រាំកក់ តែជននោះ ត្រូវបានសមត្ថកិច្ច ឃាត់ខ្លួន ក្នុងករណីហិង្សាគំរាមកំហែងសម្លាប់ និងបំផ្លិចបំផ្លាញទ្រព្យសម្បត្តិ នៅក្នុងគ្រួសារ។

នគរបាលស្រុកត្រាំកក់ ខេត្តតាកែវ បានឲ្យដឹងថា ហេតុការណ៍នេះ បានកើតឡើង នៅថ្ងៃទី១៣ ខែសីហា ឆ្នាំ២០២៣ វេលាម៉ោង ១១ ព្រឹក ក្នុងភូមិស្លា ឃុំលាយបូរ ស្រុកត្រាំកក់ ខេត្តតាកែវ។ សមត្ថកិច្ចដដែល បានបន្តថាៈ ជនសង្ស័យ មានឈ្មោះ ជៀប ប៉ាណាប៉ាក់ ភេទប្រុស អាយុ ៣២ ឆ្នាំ មុខរបរ មិនពិតប្រាកដ បានធ្វើសកម្មភាពយកកាំបិតប៉័ងតោ ដេញកាប់ ម្តាយបង្កើតរបស់ខ្លួន ឈ្មោះ ប្រាក់ សន អាយុ ៨៨ ឆ្នាំ មុខរបរ កសិករ។

ប្រភពដដែល បានបញ្ជាក់ថាៈ ករណីនេះ ឈ្មោះ ប្រាក់ សន ដែលត្រូវជាម្ដាយបង្កើត របស់ជនសង្ស័យ បានរត់គេចខ្លួនរួច ។ ប៉ុន្តែជនសង្ស័យ ក៏បានយកកាំបិតប៉័ងតោ កាប់ជញ្ចាំងផ្ទះ វាយពាង និងយកខោអាវម្តាយ ដុតចោលអស់។

បើតាមប្រភពដដែល បានបញ្ជាក់ទៀតថាៈ មូលហេតុ សុំលុយម្ដាយយកទៅទិញថ្នាំ ញៀនជក់ តែគាត់មិនឱ្យ។ បច្ចុប្បន្ន ជនសង្ស័យ ត្រូវបានប៉ូលិសសាកសួរ និងកសាងសំណុំរឿង តាមនីតិវិធី៕

ដកស្រង់ពី៖រស្មីកម្ពុជា