កម្លាំងសមត្ថកិច្ចចម្រុះ ឆ្មក់បង្ក្រាបកន្លែងលក់សត្វព្រៃមួយកន្លែង នៅស្រុកភ្នំស្រួច ខេត្តកំពង់ស្ពឺ, រកឃើញសត្វព្រៃជិត១០០គីឡូក្រាម

សេចក្ដីលម្អិត

ជំពូក៖ ព័ត៌មានសន្តិសុខសង្គម

(កំពង់ស្ពឺ)៖ កម្លាំងមូលដ្ឋានស្រុកភ្នំស្រួច សហការជាមួយក្រុមអន្គរាគមន៍បង្ក្រាបសត្វព្រៃចល័ត របស់កងរាជអាវុធហត្ថលើផ្ទៃប្រទេស និងខណ្ឌរដ្ឋបាលព្រៃឈើកំពង់ស្ពឺ ប៉ុស្តិ៍រដ្ឋបាលឃុំអូរ ដឹកនាំដោយលោកស្រី ចាត សូរស្មី ព្រះរាជអជ្ញា នៃអយ្យការអមសាលាដំបូងខេត្តកំពង់ស្ពឺ បានឆ្មក់ចូលឆែកឆេរទីតាំងលក់សត្វព្រៃមួយកន្លែង នៅតាមបណ្តោយផ្លូវជាតិលេខ៤ ស្ថិតក្នុងភូមិចេក ឃុំអូរ។

ប្រតិបត្តិការនៅថ្ងៃទី០១ ខែធ្នូ ឆ្នាំ២០១៨ បានធ្វើឡើងតាមដីកាអនុញ្ញាតឲ្យឆែកឆេរ លេខ១១៤៨០(ក) ចុះថ្ងៃទី៣០ ខែវិច្ឆិកា ឆ្នាំ២០១៨ ដែលម្ចាស់ទីតាំងឈ្មោះ ប្រាក់ សុភាស់ ភេទប្រុស អាយុ៣៣ឆ្នាំ រស់ភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ។

ក្នុងប្រតិបត្តិការខាងលើ កម្លាំងសមត្ថកិច្ចជំនាញរកឃើញ អណ្តើកសកលរស់ ចំនួន២ក្បាល ទម្ងន់១៧គីឡូក្រាម, កន្ធាយអាស៊ីរស់ ចំនួន១៥ក្បាល ទម្ងន់២៦,៨០គីឡូក្រាម, ពស់ថ្លាន់ប្រភេទតូចរស់ ចំនួន០១ក្បាល ទម្ងន់១០,៥០គីឡូក្រាម, អណ្តើកភ្នំរស់ ចំនួន០១ក្បាល ទម្ងន់០,៨០គីឡូក្រាម, អណ្តើកសោមញីរស់ ចំនួន០៣ក្បាល ទម្ងន់ ១,២០ គីឡូក្រាម, សាច់ជ្រូកព្រៃស្រស់ ចំនួន១៦គីឡូក្រាម, សាច់ឈ្លូសស្រស់ ចំនួន៦,៥០គីឡូក្រាម, សំពោចក្រអូបងាប់ ចំនួន០៤ក្បាល ទម្ងន់៨,៥០គីឡូក្រាម និងក្រចកខ្លាឃ្មុំតូច ក្រៀម ចំនួន១៤គូរ។

បច្ចុប្បន្នវត្តុតាងជាសត្វរស់ ប្រគល់ជូនមន្ត្រីរដ្ឋបាលព្រៃឈើជាអ្នកទទួលខុសត្រូវថែទាំ និងធ្វើការដោះលែងនៅព្រៃបឹងឲ្យមានសុវត្ថិភាព ចំណែកវត្ថុតាងសំណាកសត្វព្រៃ ក្រុមការងារនឹងធ្វើការដុតបំផ្លាញចោល តាមបញ្ជាលោកស្រីព្រះរាជអាជ្ញា៕

ដកស្រង់ពី៖FRESH NEWS