ស៊ិន កក្កដា សុំទោស ក្លឹប កីឡាករ និងគ្រូភ្នំពេញក្រោន រឿងដោះអាវដោយអចេតនា

សេចក្ដីលម្អិត

ជំពូក៖ ព័ត៌មានកីឡា

ខ្សែប្រយុទ្ធ ស៊ិន កក្កដា កាលពីយប់មិញនេះ បានចេញមុខមកសុំទោសក្លឹប កីឡាករ និងគ្រូបង្វឹកក្រុមភ្នំពេញក្រោនហើយ ចំពោះរឿងស៊ុតចូល ហើយអបអរដោយដោះអាវលើកបង្ហាញនោះ។

ការប្រកួតក៏ជក់ចិត្ត វិសាខា យកឈ្នះភ្នំពេញក្រោន ៤-៣ នោះ ក៏មានរឿងមួយចំនួនដែលអ្នកគាំទ្រ ក៏ដូចជាអ្នកទស្សនាផ្ទាល់មិនពេញចិត្តផងដែរ។ រឿងនោះគឺ ខ្សែប្រយុទ្ធ ស៊ិន កក្កដា ដែលជាអតីតកីឡាករក្រោន ស៊ុតបញ្ចូលទីក្រុមចាស់បានយ៉ាងស្អាត ហើយដោះអាវអបអរចំពោះគ្រាប់បាល់នោះថែមទៀត។

កត្តានេះបានធ្វើឱ្យអ្នកគាំទ្រក្រោន មិនពេញចិត្តនោះទេ ហើយសូម្បីតែខ្សែប្រយុទ្ធបរទេស Booysen Shane ក៏មិនពេញចិត្តដែរ។ ចំពោះបញ្ហានេះដែរ សាមីខ្លួន កក្កដា ផ្ទាល់ បានបង្ហោះនៅលើបណ្ដាញសង្គមកាលពីយប់មិញនេះ រូបគេបានពន្យល់ទៅរាមច្បង Shane រួចហើយ ហើយកីឡាករអាហ្វ្រិកខាងត្បូងនេះក៏យល់ពីពេលនោះដែរ។

មួយវិញទៀត កក្កដា ក៏បានគិតម្ដងហើយម្ដងទៀតសម្រាប់ការដោះអាវអបអររបស់ខ្លួន។ ដោយរូបគេបានសុំទោសដល់ក្លឹប កីឡាករ និងគ្រូបង្វឹកទាំងអស់របស់ភ្នំពេញក្រោន ចំពោះទង្វើនិងអារម្មណ៍អបអរខ្លាំងពេករបស់ខ្លួនផងដែរ ដោយអចេតនានេះ៕