ហ៊ុន ច័ន្ទរាជ្យ បានដៃគូសហការផ្ដល់កន្លែងហ្វឹកហាត់កីឡាករ MMA បន្ថែមមួយទៀតហើយ
- សេចក្ដីលម្អិត
- ជំពូក៖ ព័ត៌មានកីឡា
លោក ហ៊ុន ច័ន្ទរាជ្យ អគ្គលេខាធិការសហព័ន្ធគុនចម្រុះ MMA កម្ពុជា ថាឥលូវនេះសហព័ន្ធមានដៃគូសហការមួយទៀតហើយ គឺក្លឹបហាត់ប្រាណ The Place វាបានសម្រួលដល់ការហ្វឹកហាត់ និងជីវភាពកីឡាករមួយកម្រិតទៀត។
អគ្គលេខាធិការខាងលើនេះបានឲ្យដឹងថា សហព័ន្ធបានសហការគ្នាជាមួយក្លឹបហាត់ប្រាណខាងលើនេះយូរដែរហើយ លើសពីនេះទៀតឥលូវសិស្ស MMA អាចទៅហ្វឹកហាត់ដើម្បីពង្រឹងសមត្ថភាពរបស់ខ្លួនមុនចេញទៅប្រកួតនៅក្រៅប្រទេសផងដែរ។
អ្នកជំនាញ MMA រូបនេះបន្ថែមទៀតថា ក្លឹបខាងលើនេះគឺមានសម្ភារគ្រប់គ្រាន់ និងមានគ្រូៗជំនាញតាមផ្នែកនិមួយៗដូចជាគ្រូកម្លាំង និងគ្រូបច្ចេកទេសមួយចំនួនទៀត ហើយការហូបចុកគឺត្រឹមត្រូវតាមស្តង់ដារថែមទៀតផង ដូច្នេះជួយបានច្រើន។
ក្រៅពីការហ្វឹកហាត់ កីឡាករ MMA កម្ពុជាអាចជួយបង្ហាត់សិស្សនៅទីនោះបានថែមទៀត ដែលអាចបានចំណូលបន្ថែមទៀត។រំលឹកដែរថា ក្លឹបហាត់ប្រាណ The Place ដែលសហការជាមួយសហព័ន្ធប្រដាល់ MMA កម្ពុជានេះគឺនៅក្នុងផ្សារ AEON ទី១ ជាន់ទី៤៕