La Liga ចាត់វិធានការតាមផ្លូវច្បាប់ ចំពោះអ្នករត់ចូលទៅថតជាមួយ Messi
- សេចក្ដីលម្អិត
- ជំពូក៖ ព័ត៌មានកីឡា
ក្របខណ្ឌ La Liga គ្រោងនឹងចាត់វិធានការតាមផ្លូវច្បាប់ ប្រឆាំងជាមួយអ្នកដែលបានរត់ចូលទីលានដើម្បីទៅសុំថតរួបជាមួយ Lionel Messi កាលពីប្រកួតទល់ Mallorca កន្លងទៅ។
ក្នុងការប្រកួតដែល Barcelona យកឈ្នះលើក្រុម Mallorca បាន ៤-០ កន្លងទៅនោះ មានអ្នកគាំទ្រម្នាក់បានរត់ចូលទីលាន ដើម្បីសុំថតរួបជាមួយ Lionel Messi ។ តែដោយសារវិធានការគម្លាតសង្គម ការចង់ថតរូបនោះ មិនអាចសម្រេចបានឡើយ ដោយបុរសអ្នករត់នោះត្រូវបានក្រុមការងារចាប់ខ្លួន។
ខណៈដែលក្របខណ្ឌ La Liga វិញ ក៏ត្រៀមចាត់វិធានការលើអ្នករត់ចូលទីលានម្នាក់នេះដែរ។ លីគកំពូលអេស្ប៉ាញ បានបញ្ជាក់ថាបុរសម្នាក់នេះ បានរត់ចូលទីលាន ទាំងដែលច្បាប់បានដាក់ចេញមិនឱ្យអ្នកគាំទ្រចូលទស្សនាការប្រកួតឡើយ។
មួយវិញទៀត រូបគេបានរត់សំដៅទៅ Messi ដើម្បីបានថតរូបជិតគ្នា គ្រាដែលបច្ចុប្បន្ននេះដើម្បីសុវត្ថិភាពកុំឱ្យឆ្លង Covid-19 គឺគេតម្រូវឱ្យមានគម្លាតសង្គម។ ការរំលោភបំពាននេះហើយ ទើបបានជា La Liga ចង់ចាត់វិធានការតាមផ្លូវច្បាប់ ដើម្បីកុំឱ្យមានករណីក្រោយៗទៀត៕
