Bale បន្តចេញកាយវិការប្លែកៗ ពេលអង្គុយជាកីឡាករបម្រុងមិនបានលេង
- សេចក្ដីលម្អិត
- ជំពូក៖ ព័ត៌មានកីឡា
ខ្សែបម្រើប្រយុទ្ធ Gareth Bale បានធ្វើឲ្យអ្នកគាំទ្ររបស់ Real Madrid ចាប់អារម្មណ៍ជាថ្មី បន្ទាប់ពីគេចេញកាយវិការដាក់ដៃធ្វើកែវយឹតនៅកៅអីបម្រុង អំឡុងពេលក្រុមយកឈ្នះ Granada ២-១។
ជ័យជម្នះនេះ បន្តរុញ Madrid ដាច់៤ពិន្ទុឈរកំពូលតារាង La Liga ជាមួយការប្រកួតសល់តែ២ប្រកួតទៀតប៉ុណ្ណោះ។ ហើយនេះក៏អាចជាការឈ្នះពានលីគជាលើកទី២សម្រាប់ Bale ក្នុងការចំណាយពេល៧ឆ្នាំនៅ Real។
យ៉ាងណាក្ដី កីឡាករសញ្ជាតិវែលបន្តទទួលបានការរិះគន់សម្រាប់ការប្រកួតយប់មិញ ភ្ជាប់ជាមួយកាលពីថ្ងៃសុក្រកន្លងទៅគេបានយកម៉ាស់គ្របភ្នែកដេកលក់មួយសន្ទុះ អំឡុងពេល Real ជួប Alaves។
Bale ចាប់ផ្ដើមជាជម្រើសដំបូងបានតែ១២ប្រកួតប៉ុណ្ណោះក្នុងរដូវកាលនេះ និងមិនបានបង្ហាញខ្លួន៤ប្រកួតចុងក្រោយរបស់ Madrid ទេ ខណៈក្លឹបរបស់ខ្លួនជិតក្លាយជាជើងឯកទៅហើយ៕