សេរីវណ្ណថង៖ កូវីដ បែបនេះអាណិតកីឡាករដែលត្រូវចំណាយច្រើនលើគ្រួសារ
- សេចក្ដីលម្អិត
- ជំពូក៖ ព័ត៌មានកីឡា
កីឡាករវ័យក្មេង ឈិត សេរីវណ្ណថង ថាឆាប់ចប់ជំងឺកូវីដទៅ ព្រោះអាណិតរៀមច្បងមួយចំនួនដែលត្រូវការចំណាយប្រាក់ច្រើនលើគ្រួសារខណៈឥលូវបិទសង្វៀនស្មើអត់ចំណូល។
ឈិត សេរីវណ្ណថង បានឲ្យដឹងថា អំឡុងកូវីដ នេះសម្រាប់ខ្លួនក៏បាត់ចំណូលមួយភាគធំដែរ ប៉ុន្តែមិនសូវប៉ះពាល់ដល់ជីវភាពប៉ុន្មានទេ ព្រោះរស់នៅជាមួយឪពុកម្ដាយមិនចំណាយអ្វីច្រើននោះឡើយ។ មួយវិញទៀតមានប្រាក់ខែសម្រាប់ទប់ខ្លះៗផងដែរ។
អ្នកលេងគុនខ្មែរមកពីបាត់ដំបងខាងលើបន្តលើកឡើងទៀតថា ពេលបិទសង្វៀនមួយរយៈបែបនេះគឺប្រហែលជាប៉ះពាល់ដល់ជីវភាពកីឡាករមួយចំនួនហើយ ព្រោះឡើងប្រកួតទើបបានថវិកា។
កីឡាករខ្លះត្រូវចំណាយច្រើនលើការផ្គត់ផ្គង់គ្រួសារ កូនចៅជាដើម ដល់បិទសង្វៀនជាចំណូលធំបែបនេះច្បាស់ណាស់ពួកគេនឹងពិបាក ដូច្នេះមានតែសូមឲ្យឆាប់បាត់ កូវីដ ទៅវិញប៉ុណ្ណោះ។
រំលឹកដែរថា សហព័ន្ធគុនខ្មែរ បានចេញសេចក្ដីប្រកាសបិទគ្រប់សង្វៀនប្រដាល់នៅកម្ពុជារយៈពេល២សប្ដាហ៍សិន បន្ទាប់ពីមានព្រឹត្តិការណ៍ ២៨ វិច្ឆិកា ឆ្នាំ២០២០ ថ្មីៗនេះហើយក៏មិនទាន់បញ្ជាក់ថានឹងត្រូវដំណើរការប្រកួតវិញនៅពេលណាដែរ៕
