លោក Zidane ថាគ្រប់យ៉ាងរបស់លោកអាជ្ញាកណ្ដាលសម្រេចលើទីលាន គឺលោកគោរពតាមទាំងអស់ ព្រោះនេះជាការងាររបស់អាជ្ញាកណ្ដាលក្នុងការប្រកួត។
នៅយប់មិញនេះ ក្រុម FC Barcelona នៅមិនសប្បាយចិត្តនោះទេ ដោយសារតែអាជ្ញាកណ្ដាលមិនព្រមផ្ដល់បាល់១១ម៉ែត្រ នៅពេលកីឡាករ Braithwaite បានដួលនៅតំបន់គ្រោះថ្នាក់ បន្ទាប់ពីប្រជែងជាមួយខ្សែការពារ Mendy ។ លោក Koeman ថាអាជ្ញាកណ្ដាល កាត់ក្ដីមិនសមទេ ព្រោះវាច្បាស់ណាស់ថាគួរតែពិន័យបាល់ប៉េណាល់ទី។
ដោយចប់ការប្រកួត ក្រុមការងាររបស់លោក បានចូលទៅតវ៉ាជាមួយអាជ្ញាកណ្ដាលខ្លាំង។ ជាមួយរឿងនេះដែរ លោក Zidane អ្នកចាត់ការក្រុម Real Madrid មានយោបល់ថា៖ “គ្រប់គ្នាសុទ្ធតែមានគំនិតខ្លួនឯង។ ខ្ញុំគិតថា ប្រសិនបើអាជ្ញាកណ្ដាលមិនផ្ដល់បាល់ប៉េណាល់ទី ព្រោះវាមិនមែនប៉េណាល់ទី។
រឿងសំខាន់គឺអ្វីដែលយើងបានធ្វើលើទីលានថ្ងៃនេះ យើងក៏ឈឺចាប់ច្រើនដែរ ព្រោះ Barcelona ជាក្រុមល្អ។ អ្នកមិនអាចនិយាយថា អាជ្ញាកណ្ដាលជាអ្នកសម្រេចការប្រកួតនោះទេ”៕