កប់ក្ដោង! មកដឹងពីប្រាក់រង្វាន់ម្ចាស់មេដាយមាសថៃ នឹងទទួលបានពីរដ្ឋដល់ទៅសែនដុល្លារ
- សេចក្ដីលម្អិត
- ជំពូក៖ ព័ត៌មានកីឡា
កីឡាការិនី Panipak Wongpattanakit រកបានមេដាយមាសដំបូងឲ្យប្រទេសថៃ ក្នុងព្រឹត្តិកាណ៍អូឡាំពិកទីក្រុងតូក្យូ ប្រទេសជប៉ុនកាលពីថ្ងៃសៅរ៍កន្លងទៅ។
កីឡាការិនីវ័យទើប២៣ឆ្នាំរកបានមេដាយតាមរយៈកីឡាតេក្វាន់ដូ វិញ្ញាសារនារីក្នុងប្រភេទទម្ងន់៤៩គ.ក។ នាងត្រឡប់មកកាន់ប្រទេសកំណើតវិញនៅថ្ងៃច័ន្ទនេះពីទីក្រុងតូក្យូ ប៉ុន្តែត្រូវធ្វើចត្តាឡីស័ករយៈពេល១៤ថ្ងៃសិន ទើបអាចទៅផ្ទះបាន។
តាមប្រភពពីកាសែត Bangkok Post ឲ្យដឹងថា អត្តពលិកថៃដែលអាចរកបានមេដាយមាសជូនជាតិនឹងទទួលបានប្រាក់រង្វាន់លើកទឹកចិត្ត១២លានបាត (ជាង៣សែនដុល្លារ)។
សម្រាប់មេដាយប្រាក់បាន៧,២លានបាត (ជាង២សែនដុល្លារ) និងមេដាយសំរិទ្ធិបាន៤,៨លានបាត(ជាង១សែនដុល្លារ) ពីរដ្ឋាភិបាលតាមរយៈមូលនិធិអភិវឌ្ឍន៍កីឡាជាតិ។
Panipak មានប្រវត្តិមិនធម្មតាឡើយ កាលព្រឹត្តិការណ៍អូឡាំពិកទីក្រុង Rio de Janeiro ឆ្នាំ២០១៦ ក៏ធ្លាប់យកបានមេដាយសំរិទ្ធិជូនជាតិផងដែរ។ នាងធ្លាប់ឈ្នះមេដាយមាស២ដង និងប្រាក់ម្ដងក្នុងព្រឹត្តិការណ៍ស៊ីហ្គេម។
Panipak ក៏ជាម្ចាស់មេដាយមាស២ដងក្នុងព្រឹត្តិកាណ៍ពិភពលោកកាលពីឆ្នាំ២០១៥និង២០១៩។ សរុបមេដាយមាសដែលកីឡាការិនីវ័យក្មេងរូបនេះរកមានមានដល់២០គ្រឿងគិតគ្រប់កម្មវិធីប្រកួតអន្តរជាតិ៕
