អគ្គលេខាធិការសហព័ន្ធកង់៖ សិក្ខាកាមត្រូវប្រឹងប្រែងសិក្សាក្នុងវគ្គគ្រូបង្វឹកកម្រិត១
- សេចក្ដីលម្អិត
- ជំពូក៖ ព័ត៌មានកីឡា
អគ្គលេខាធិការសហព័ន្ធទោចក្រយាន លើកទឹកចិត្តដល់សិក្ខាកាមទាំង២៥នាក់ឲ្យខំប្រឹងប្រែងសិក្សាដើម្បីឲ្យប្រឡងជាប់ក្នុងវគ្គបណ្ដុះបណ្ដាលគ្រូកម្រិត១ ដែលកំពុងធ្វើឡើងនៅពេលនេះ។
លោក នូ ចំរើន អគ្គលេខាធិការសហព័ន្ធទោចក្រយាន បានលើកឡើងថា វគ្គបណ្ដុះបណ្ដាលគ្រូកម្រិត១ នេះគឺមានសារប្រយោជន៍ខ្លាំងចំពោះសិក្ខាកាមដែលចូលរួមដើម្បីអភិវឌ្ឍន៍សមត្ថភាព និងការជួយផ្សព្វផ្សាយបង្កើនធនធានកីឡាករ កីឡាការិនីបន្ថែម។
ដូច្នេះហើយសិក្ខាកាមត្រូវខំប្រឹងប្រែងសិក្សា ស្វែងយល់ដើម្បីទទួលបាននូវចំណេះដឹងល្អៗថ្មីៗដែលបានចែករំលែកពីគ្រូឧបទេស។ លោកសង្ឃឹមថាសិក្ខាកាមនឹងប្រឡងជាប់នៃការធ្វើតេស្តបញ្ចប់វគ្គដើម្បីឈានទៅសិក្សាកម្រិត២ ឬកម្រិត៣ នៅពេលខាងមុខៗទៀត។
រំលឹកដែរថា សហព័ន្ធទោចក្រយាន ម្សិលមិញនេះបានបើកវគ្គបណ្ដុះបណ្ដាលគ្រូកម្រិត១ នៅទីស្នាក់ការ NOCC។ វគ្គសិក្សានេះមានរយៈពេល ៥ថ្ងៃចាប់ពីថ្ងៃទី២២ ដល់ ២៦ ខែវិច្ឆិកា ២០២១។ សិក្ខាកាមចូលរួមមាន២៥នាក់៕
