ល្បីថាក្លឹបបាល់ទាត់ និងក្រុមជម្រើសជាតិរបស់រុស្ស៊ី កំពុងគិតគូរផ្លាស់មកប្រកួតនៅក្របខ័ណ្ឌអាស៊ី
- សេចក្ដីលម្អិត
- ជំពូក៖ ព័ត៌មានកីឡា
ក្លឹបបាល់ទាត់ និងក្រុមជម្រើសជាតិរបស់រុស្ស៊ីត្រូវបានប្រភពជាច្រើនចុះផ្សាយថា កំពុងគិតគូរផ្លាស់មកប្រកួតបាល់ទាត់នៅក្របខ័ណ្ឌអាស៊ី។ នេះបើយោងតាមការចុះផ្សាយរបស់ Daily Mail នៅក្នុងថ្ងៃនេះ។
មូលហេតុដែលក្លឹបបាល់ទាត់ ក៏ដូចជាក្រុមជម្រើសជាតិរុស្ស៊ីគិតគូរចង់ចូលជាសមាជិករបស់សហព័ន្ធកីឡាបាល់ទាត់អាស៊ី (AFC) ដើម្បីមកចូលរួមប្រកួតនៅក្របខ័ណ្ឌអាស៊ីនេះគឺដោយសារតែក្លឹបនិងក្រុមជម្រើសជាតិនេះត្រូវក្របខ័ណ្ឌបាល់ទាត់អឺរ៉ុប UEFA ក៏ដូចជា FIFA ដកចេញពីការប្រកួតទាំងអស់ចាប់តាំងពីសង្គ្រាមនៅអ៊ុយក្រែនផ្ទុះឡើង។
បើតាមប្រភពខាងលើ កន្លងមកក៏មានប្រទេសមួយចំនួនដូចជាប្រទេសអ៊ីស្រាអែល និងកាហ្សាក់ស្ថាន ដែលធ្លាប់ផ្លាស់ពីប្រកួតក្របខ័ណ្ឌអាស៊ី ទៅក្របខ័ណ្ឌអឺរ៉ុបផងដែរ។
គួរបញ្ជាក់ផងដែរថា ប្រទេសរុស្ស៊ីជាប្រទេសដែលជាប់ទ្វីបទាំងអឺរ៉ុប និងទ្វីបអាស៊ី ដោយផ្ទៃដី៧៧%នៃប្រទេសនេះគឺនៅក្នុងទ្វីបអាស៊ី៕
