កុំភ្លេច! ល្ងាចនេះបាល់ទាត់កម្ពុជា ប៉ះជាមួយ​អាហ្វ​ហ្គានីស្ថាន នៅ​ស្តាត​អូឡាំពិក

សេចក្ដីលម្អិត

ជំពូក៖ ព័ត៌មានកីឡា

ភ្នំពេញ៖ នៅសល់តែប៉ុន្មាន ម៉ោងទៀតប៉ុណ្ណោះ ពោលគឺនៅម៉ោង ៦៖៣០នាទី ល្ងាចថ្ងៃអង្គារ ទី១៦ ខែមិថុនា ឆ្នាំ ២០១៥ នេះ ក្រុមបាល់ទាត់ ឈុតធំ ជម្រើសជាតិកម្ពុជា នឹងជួបប្រកួត ជាមួយក្រុមភ្ញៀវ ជម្រើសជាតិ អាហ្វហ្គានីស្ថាន ហើយនៅពហុ កីឡដ្ឋានជាតិ អូឡាំពិក ដោយមានលោក Liu Kwok Man ជនជាតិចិន ហុងកុង ជាអាជ្ញាកណ្តាល ។

នេះជាការប្រកួត លើកទី២ សម្រាប់ក្រុមទាំងពីរ នៃវគ្គជម្រុះ World Cup 2018 នៅរុស្ស៊ី ប្រចាំពូល E នៃវគ្គជម្រុះ ជើងទី១ ជុំទី២ ក្នុងទ្វីបអាស៊ី ក្រោយពេល១ប្រកួត ដំបូងសុទ្ធតែ បានចាញ់ដូចគ្នា គឺកម្ពុជា បានចាញ់សិង្ហបុរី ៤-០ ខណៈដែល អាហ្វហ្គានីស្ថាន ត្រូវបានក្រុមភ្ញៀវ ស៊ីរីបំបាក់ រហូតទៅ ៦-០ដាច់ នាថ្ងៃទី១១ មិថុនា ឆ្នាំ២០១៥ ។

ជាមួយគ្នានោះដែរ លោក សុខា រ៉ានាថ ប្រធានទីផ្សារ និងទំនាក់ទំនង របស់សហព័ន្ធ កីឡាបាល់ទាត់ កម្ពុជា ក៏បានថ្លែងប្រាប់ តាមទូរស័ព្ទ ព្រឹកនេះថា សំបុត្រជាង ៣០០០០សន្លឹក ត្រូវបានលក់ ចេញអស់ហើយ ក្នុងចំ ណោម សំបុត្រចំនួន ៥០០០០ សន្លឹក ដែលដាក់លក់ លើកនេះទៅលើ តម្លៃ៣ប្រភេទ រួមមាន ៣០០០០៛, ២០០០០៛ និង ៨០០០៛ នៅទីតាំងលក់ ក្នុងស្តាតអូឡាំពិក តែមួយគត់ ។

ទន្ទឹមនេះដែរ ក្រុមខ្លាំងប្រចាំ ទ្វីបអាស៊ី សាម៉ូរៃ ជប៉ុន ក៏បើកឆាក ជម្រុះ World Cup 2018 របស់ខ្លួនផងដែរ ដោយត្រូវ ទទួលស្វាគមន៍ ក្រុមភ្ញៀវ ដែលទើបតែ ទទួលបាន៣ពិន្ទុ សិង្ហបុរី ក្រោយយកឈ្នះ កម្ពុជា ៤-០ កាលពីថ្ងៃ បើកឆាក ដែលនឹងចាប់ផ្តើម នាម៉ោង ៥៖៣០នាទី ល្ងាចនេះ នៅកីឡដ្ឋាន Saitama ស្ថិតក្នុងទីក្រុង Saitama តែម្តង ៕

ដកស្រង់ពី៖ ដើមអម្ពិល