សួន ចាន់ណារ៉ូ ទម្លាយពីតិកនិកចាប់កុកថៃក្នុងការប៉ះគ្នាវគ្គដណ្ដើមមេដាយសំរឹទ្ធ
- សេចក្ដីលម្អិត
- ជំពូក៖ ព័ត៌មានកីឡា
ដៃប៉ះសេស្រុកខ្មែរ សួន ចាន់ណារ៉ូ ទម្លាយពីតិកនិកចាប់កុកយកឈ្នះថៃ៣-២ ក្នុងការប្រកួតស៊ីហ្គេមនៅវៀតណាម ដែលទើបបញ្ចប់ថ្មី ក្រោយក្រុមបាល់ទះកម្ពុជាដណ្ដើមបានមេដាយសំរឹទ្ធ និងបានត្រឡប់មកកាន់ទឹកដីកំណើតកាលពីល្ងាចថ្ងៃទី២៣ ខែឧសភា ឆ្នាំ២០២៣។
ប្រធានក្រុមជម្រើសជាតិបាល់ទះក្នុងសាលរបស់កម្ពុជារូបនេះបានឲ្យដឹងថា ជាការពិតក្រុមកម្ពុជាបានប្រឹងប្រែងទាំងកម្លាំងកាយ និងពិសេសគឺប្រឹងអស់កម្លាំងចិត្តដើម្បីលេងទល់ថៃនាប្រកួតចុងក្រោយ ដោយសារតែកីឡាករកម្ពុជាហាក់មានការថមថយកម្លាំង ពិសេសទៀតនោះអ្នកខ្លះថែមទាំងមានរបួសទៀតផង។
តែយ៉ាងណាក្រុមកម្ពុជាបានស្វែងយល់ពីកម្រិតនៃការលេងរបស់ថៃ និងតាក់ទិកក្បួនដៃគូខ្លាំងមួយនេះរហូតអាចបំបែកបាន។ «ចំណុចដែលយើងអាចបំបែកថៃបានបង ដែលមានចំណុចខ្លះដែលយើងធ្លាប់លេងជាមួយថៃ ដូចជាការធ្វើរនាំង ការចាប់សេវា ឬក៏ការវាយសេវាបង។
… ក្រុមកីឡាករយើងទាំងអស់បានប្រមូលផ្ដុំគ្នាចាប់ម្នាក់១ៗនូវរ៉ូលដែលខាងថៃលេង ចឹងហើយពេលយើងចូលលេងទើបយើងអាចចាប់គេបាន។ មួយវិញទៀតខាងថៃការវាយសេវារបស់គេក៏មិនបង្កការលំបាកដល់យើងក្នុងការចាប់ប៉ុន្មានដូចក្រុមឥណ្ឌូណេស៊ីដែរ។
បើនិយាយពីការវាយសេវារបស់ឥណ្ឌូវិញគឺលឿន ធ្ងន់ហើយ ខុសមនុស្សទៀត ដូច្នេះហើយទើបយើងពិបាកលេងទល់ឥណ្ឌូណេស៊ី»។ នេះជាការលើកឡើងរបស់ សួន ចាន់ណារ៉ូ។
រំលឹកថា ការយកបានមេដាយសំរឹទ្ធនេះមិនមែនជារឿងងាយស្រួលឡើយ សម្រាប់កម្ពុជាដែលស្ថិតនៅពូលជាមួយអតីតម្ចាស់មេដាយសំរឹទ្ធឆ្នាំ២០១៩ ហ្វីលីពីន និងអតីតម្ចាស់មេដាយប្រាក់ថៃ ឆ្នាំ២០១៩ នៅស៊ីហ្គេមឆ្នាំ២០១៩។ ដោយឆ្នាំនេះកម្ពុជាបានយកឈ្នះហ្វីលីពីន ៣-១ នៅវគ្គសន្សំពិន្ទុ និងចាញ់ថៃ ៣-២ នៅវគ្គសន្សំពិន្ទុ។
ឡើងដល់វគ្គពាក់កណ្ដាលផ្ដាច់ព្រ័ត្រកម្ពុជាចាញ់ឥណ្ឌូណេស៊ី ៣-១ និងចុងក្រោយវគ្គដណ្ដើមមេដាយសំរឹទ្ធកម្ពុជាឈ្នះថៃ ៣-២ វិញ៕
