Dean Hendersonថា​ Man Utd ក្បត់​សន្យា​មិន​ឲ្យ​តំណែង​អ្នកចាំទី​ដៃ​ទី​១ មក​ឲ្យ​គេ

សេចក្ដីលម្អិត

ជំពូក៖ ព័ត៌មានកីឡា

អ្នកចាំទី Dean Henderson ដែលជាអ្នកចាំទីរបស់ក្លឹប Manchester United ដែលបានផ្លាស់ទៅកាន់ក្លឹប Nottingham Forest នៅរដូវកាលឆ្នាំ២០២២/២៣ ក្នុងលក្ខខ័ណ្ឌខ្ចីជើងបានអះអាងទៅអ្នកកាសែតថា ក្លឹប Man Utd ក្បត់សន្យាមិនឲ្យតំណែងអ្នកចាំទីដៃទី១មកឲ្យគេ។

Henderson បាននិយាយថា៖" ខ្ញុំធ្លាប់និយាយជាមួយ Man Utd បន្ទាប់ប្រកួត Euro 2020 ដោយពេលនោះពួកសន្យានឹងឲ្យខ្ញុំជាតំណែងអ្នកចាំទីដៃទី១។ បន្ទាប់មកខ្ញុំក៏កើតកូវីដ បន្ទាប់ជាត្រលប់មកវិញមក អត់មាននរណាគេធ្វើតាមការសន្យាហ្នឹងទេ "។

អ្នកចាំទីនេះបន្តថា៖" និយាយទៅរឿងហ្នឹងធ្វើឲ្យខ្ញុំក្ដៅក្រហាយមែនទែន ព្រោះតែខ្ញុំបានច្រានលក្ខខ័ណ្ឌខ្ចីជើងល្អៗជាច្រើន បន្ទាប់មកទៀតពេលខ្ញុំចង់ផ្លាស់ចេញ ពួកគេអត់ឲ្យចេញទៀត អញ្ចឹងធ្វើឲ្យកាន់តែក្ដៅមែនទែន។

និយាយទៅអង្គុយលេង ១២ខែចោលដូចជាអ្នកទោសអញ្ចឹងក្នុងវ័យរបស់ខ្ញុំនេះ ខ្ញុំគឺខឹងមែនទែនពេលហ្នឹង។ តែយ៉ាងណា ខ្ញុំនៅតែបន្តខិតខំពង្រឹងសមត្ថភាពទាំងលើទីលានហ្វឹកហាត់ និងក្រៅទីលានហ្វឹកហាត់។ ហើយឥឡូវនេះខ្ញុំបានមកវិញហើយ ខ្ញុំរំពឹងច្រើនជាមួយនឹងក្រុម Forest នេះ "។

Dean Henderson ផ្លាស់ទៅកាន់ក្លឹប Nottingham Forest ក្នុងលក្ខខ័ណ្ឌខ្ចីជើង ១ឆ្នាំប៉ុណ្ណោះសម្រាប់រដូវកាល ២០២២/២៣៕