Iniesta ឱ្យ​តម្រុយ​ថា ខ្លួន​អាច​នឹង​ត្រលប់​មក Barcelona វិញ

សេចក្ដីលម្អិត

ជំពូក៖ ព័ត៌មានកីឡា

ខ្សែបម្រើចាស់វស្សាកីឡាករ Andres Iniesta បាននិយាយប្រាប់សារព័ត៌មានអេស្ប៉ាញ Gazzetta ថា ខ្លួនអាចនឹងត្រលប់មកក្លឹប Barcelona ក្រោយពីបញ្ចប់បេសកកម្មរបស់ខ្លួននៅស្រុកជប៉ុន។

Iniesta បាននិយាយថា៖ «ខ្ញុំពិតជាចង់មក Barcelona វិញណាស់»។ លោកបានបន្តថា៖ «ទីនេះជាផ្ទះរបស់ខ្ញុំ តែខ្ញុំមិនដឹងថានឹងត្រលប់មកវិញក្នុងតួនាទីជាអ្វីនោះទេ ប្រហែលជាគ្រូបង្គោល នាយកផ្នែកកីឡា ឬក៏តួនាទីនានាស្រដៀងគ្នានេះ»។

ខ្សែបម្រើរូបនេះប្រឡូកជាមួយក្លឹប Barcelona តាំងពីឆ្នាំ១៩៩៦ ដោយលេងក្នុងឈុតយុវជន។ កីឡាកររូបនេះលេងនៅក្លឹបកាតាឡាន់នេះរហូតដល់ឆ្នាំ២០១៨ ដែលជាពេលដែលគេផ្លាស់ទៅលេងនៅជប៉ុន។ កីឡាករវ័យ ៣៨ឆ្នាំរូបនេះកំពុងតែលេងឱ្យក្លឹបជប៉ុន Vissel Kobe។

សារព័ត៌មានមួយចំនួនបានចុះផ្សាយថា លោកគ្រោងនឹងបន្តលេងនៅជប៉ុន ១ឆ្នាំទៀតមុននឹងត្រលប់មកអឺរ៉ុបវិញ៕