ប្រភពជិតស្និទ្ធថា ចាន់ វឌ្ឍនាកា មិនលេងនៅកម្ពុជាទេសម្រាប់រដូវកាលថ្មី
- សេចក្ដីលម្អិត
- ជំពូក៖ ព័ត៌មានកីឡា
អ្នកគាំទ្របាល់ទាត់កម្ពុជា និងអ្នកតាមដានវិស័យបាល់ទាត់កម្ពុជាបានដឹងហើយថា ពីរថ្ងៃកន្លងទៅនេះតារាឆ្នើមជម្រើសជាតិកម្ពុជា និងបឹងកេតអង្គរ ចាន់ វឌ្ឍនាកា បានបង្ហោះពាក្យមួយដែលថា ជិតបែកគ្នាហើយ នៅលើបណ្តាញសង្គម Facebook របស់ខ្លួនដែលនេះហាក់ដូចជាចេតនាចង់ប្រាប់អ្នកគាំទ្រថា រូបគេនឹងឃ្លាតឆ្ងាយពីអ្នកគាំទ្រកម្ពុជា។
កាលពីល្ងាចថ្ងៃសុក្រសប្តាហ៍កន្លងទៅនេះ ចាន់ វឌ្ឍនាកា បានសរសេរលើ Facebook ថា ៖«អរគុណបងប្អូនទាំងអស់គ្នា យើងជិតបែកគ្នាហើយ»។ចំណុចនេះបានធ្វើឲ្យអ្នកគាំទ្ររបស់ខ្លួនចាប់អារម្មណ៍ និងបង្កើតជាចម្ងល់យ៉ាងខ្លាំងថាតើកីឡាករបាល់ទាត់ដ៏ល្បីរូបនេះមានចេតនាបង្ហាញពីគោលបំណងអ្វីឲ្យប្រាកដ។
នៅខាងក្រោមសាររបស់កីឡាកររូបនេះមានការចោទសួរពីអ្នកគាំទ្រថា តើរូបគេនឹងទៅណា? ប៉ុន្តែសមាជិកបឹងកេតអង្គរម្នាក់នេះបានឆ្លយតបឡើយ។ ជុំវិញបញ្ហានេះ អ្នកជិតស្និទ្ធនឹងកីឡាកររូបនេះបានប្រាប់ថា រដូវកាលថ្មីខាងមុខនេះ ចាន់ វឌ្ឍនាកា មិននៅលេងបាល់ទាត់នៅប្រទេសកម្ពុជាឡើយ ប៉ុន្តែមិនទាន់ច្បាស់ថាតើទៅលេងនៅប្រទេសជប៉ុន ឬថៃ។ ប្រភពព័ត៌មាននេះបញ្ជាក់ថា ចុងខែមករា នេះព័ត៌មាននឹងដឹងច្បាស់លាស់ហើយពីអនាគតរបស់កូនប្រុសអភិបាលខេត្តកំពតម្នាក់នេះ។
ដកស្រង់ពី៖ Sabay