ល្បុក្កតោថ្នាក់ជាតិឆ្នាំ២០១៧ នឹងរៀបចំនៅដើមខែក្រោយ
- សេចក្ដីលម្អិត
- ជំពូក៖ ព័ត៌មានកីឡា
ព្រឹត្តិការណ៍ ប្រកួតថ្នាក់ជាតិ របស់សហព័ន្ធ គុនល្បុក្កតោ នឹងរៀបចំឡើង ចន្លោះពីថ្ងៃទី៩ ដល់ ១១ ខែធ្នូ ឆ្នាំ២០១៧ នៅអគារ ដំបូលទូក ក្នុងបរិវេណ សកលវិទ្យាល័យ ភូមិន្ទភ្នំពេញ។
តាមការបញ្ជាក់របស់លោក អ៊ូ តារា អគ្គលេខាធិការសហព័ន្ធកីឡាគុនល្បុក្កតោកម្ពុជាបានឲ្យដឹងថា ការចុះឈ្មោះ នឹងបិទនៅថ្ងៃទី២ ខែធ្នូ ឆ្នាំ២០១៧។ បើគិតត្រឹមពេលនេះអ្នកដែលបានចុះឈ្មោះរួចរាល់មានចំនួន ១២០ នាក់ហើយ ប៉ុន្តែចំនួននេះ នឹងមានការកើនឡើង។
លោកបង្ហាញពីគោលបំណងថា ព្រឹត្តិការណ៍នេះបង្កើតឡើង ដើម្បីផ្ដល់ឱកាសឲ្យកីឡាករនៅតាមបណ្ដាខេត្តបានបង្ហាញសមត្ថភាព។ អ្វីដែលពិសេសអាចឲ្យកីឡាករមើលឃើញពីចំណុចខ្វះខាតរបស់ខ្លួនឯង ហើយយកចំណុចទាំងអស់ទៅកែប្រែ ដើម្បីទិសដៅយូរអង្វែងជារួមគឺឆ្នាំ២០២៣ ដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម។
ព្រឹត្តិការណ៍ប្រកួតថ្នាក់ជាតិកីឡាគុនល្បុក្កតោ បានចាប់ផ្ដើមរៀបចំដំបូងបង្អស់នៅឆ្នាំ២០១៤ ដោយធ្វើឡើងជារៀងរាល់ឆ្នាំ៕
ដកស្រង់ពី៖ Sabay