អាជ្ញាកណ្ដាល ចៅក្រមវាយកូនឃ្លីលើតុ ៨រូប ប្រឡងជាប់កម្រិតមូលដ្ឋាន និងទទួលស្គាល់ពីស្ថាប័នអន្តរជាតិ
- សេចក្ដីលម្អិត
- ជំពូក៖ ព័ត៌មានកីឡា
ក្នុងចំណោមសិក្ខាកាម ២៥រូប ដែលបាន ចូលរួម វគ្គបណ្ដុះបណ្ដាល អាជ្ញាកណ្ដាល ចៅក្រម ថ្នាក់មូលដ្ឋាន ៣ថ្ងៃកន្លងទៅនេះ មាន៨នាក់ ដែលប្រឡងជាប់ និងទទួលស្គាល់ ដោយសហព័ន្ធ វាយកូនឃ្លីលើតុអន្តរជាតិ។
លោក ប៊ុយ សុភ័ណ្ឌ អគ្គលេខាធិការស្ដីទីសហព័ន្ធវាយកូនឃ្លីលើតុបានឲ្យដឹងថា ឆ្លងកាត់វគ្គបណ្ដុះបណ្ដាល៣ថ្ងៃកន្លងទៅនេះ មើលឃើញថា សិក្ខាកាម មានការផុលផុស និងទទួលបានចំណេះដឹងថ្មីៗច្រើន ដូចជាបទបញ្ជាផ្សេងៗដែលពួកគេមិនធ្លាប់បានដឹងពីមុនមក។
ក្រៅពីនោះសិក្ខាកាមបានសិក្សាបន្ថែមនូវកិច្ចការមួយចំនួនដែលពួកគេត្រូវយកទៅអនុវត្ត នៅពេលធ្វើជាអាជ្ញាកណ្ដាល និងចៅក្រមនានានៅពេលរៀបចំការប្រកួតខាងមុខ។ លោកអគ្គលេខាធិការស្តីទីខាងលើបន្ថែមទៀតថា នេះជាជំហានមួយសម្រាប់អាជ្ញាកណ្ដាល ចៅក្រមទាំងអស់បានពង្រឹងចំណេះដឹងថែមទៀត ហើយនៅខែមីនាខាងមុខនេះ សហព័ន្ធគ្រោងនឹងបើកវគ្គបណ្ដុះបណ្ដាលជាថ្មីទៀត។
បន្ទាប់ពីបញ្ចប់វគ្គបណ្ដុះបណ្ដាលលើកទី២រួច សហព័ន្ធវាយកូនឃ្លីលើតុកម្ពុជា នឹងស្នើសុំទៅសហព័ន្ធវាយកូនឃ្លីអន្តរជាតិ ដើម្បីធ្វើការប្រឡងនៅកម្ពុជា។ ប្រសិនពួកគេប្រឡងជាប់នោះ នឹងក្លាយជាចៅក្រម អាជ្ញាកណ្ដាលអន្តរជាតិតែម្ដង ហើយអាចចូលរួមក្នុងព្រឹត្តិការណ៍អន្តរជាតិដូចជា ស៊ីហ្គេម ជាដើមផងដែរ។
វគ្គបណ្ដុះបណ្ដាលចៅក្រម អាជ្ញាកណ្ដាលកម្រិតមូលដ្ឋាននេះប្រព្រឹត្តទៅរយៈពេល៣ថ្ងៃគឺចាប់ពីថ្ងៃទី១៩ ដល់ ២១ ខែមករា ឆ្នាំ២០១៨ នៅ NOCC ដែលមានសិក្ខាកាម ២៥នាក់ សុទ្ធជាចៅក្រម អាជ្ញាកណ្ដាលថ្នាក់ជាតិ និងអតីតកីឡាករផងដែរ។ វគ្គបណ្ដុះបណ្ដាលនេះក៏បានគ្រូឧបទេសកម្រិតអន្តរជាតិមកពីប្រទេសហ្វីលីពីនទៀតផង៕
ដកស្រង់ពី៖ Sabay