ក្រោយចប់ពាននៅក្រៅប្រទេស ទ័ពនៅសល់ពាន ACC មួយទៀតនៅខែក្រោយ
- សេចក្ដីលម្អិត
- ជំពូក៖ ព័ត៌មានកីឡា
ក្លឹបក្រសួងការពារជាតិ នឹងត្រូវចូលលេង ពានរង្វាន់មួយទៀត ឈ្មោះថា Asia Club Pre-Season Championship (ACC) ដោយមានក្រុម ចូលរួម៦ក្រុម កម្ពុជា៣ក្រុមនិង បរទេស៣ក្រុម។
Asia Club Pre-Season Championship (ACC) ជាពានរង្វាន់មួយដែលបង្កើតឡើងដោយក្រុមក្រសួងការពារជាតិលេងដើម្បីត្រៀមលីគរដូវកាលថ្មី។ កាលពីឆ្នាំមុនពាននេះបានបង្កើតឡើងម្ដងហើយ ដោយមានក្លឹបចូលរួមត្រឹមតែ៤ក្លឹបប៉ុណ្ណោះ។ យ៉ាងណាមិញ រដូវកាលថ្មីនេះវិញ បើតាមលោក ខូវ ឆាយ បញ្ជាក់ថាអាចនឹងមានក្លឹបចូលរួមដល់ទៅ៦ក្លឹប កម្ពុជា៣នឹងបរទេស៣។ ក្លឹបកម្ពុជាទាំង៣នោះរួមមានក្រសួងការពារជាតិផ្ទាល់ ភ្នំពេញក្រោន និងព្រះខ័នរាជស្វាយរៀង។
ដោយឡែកក្លឹបបរទេសវិញ អាចជាក្លឹបនៅសិង្ហបុរី២ក្លឹប និងក្លឹបនៅថៃឬក្លឹបនៅម៉ាឡេស៊ី ដែលខាងក្រុមការងារកំពុងចរចា។ ការប្រកួតនេះដែរ អាចនឹងប្រើទីលាន២ គឺកីឡដ្ឋាន RSN និងពហុកីឡដ្ឋានជាតិ ខណៈដែលស្ដាតចាស់វិញ អាចនឹងមិនប្រើទេ ព្រោះត្រូវជួសជុលឡើងវិញ។ ក្រុមដែលដឹកនាំដោយលោក ទេព ឡុងរចនា ទើបតែបញ្ចប់ភារកិច្ចមិត្តភាពអន្តរជាតិមួយនៅប្រទេសឥណ្ឌូណេស៊ី ( Super Cup Asia 2018) ដោយពួកគេទទួលបានចំណាត់ថ្នាក់លេខ២ក្នុងការប្រកួតនោះ៕
ដកស្រង់ពី៖ Sabay